Ex-Gilas players handang tumulong
MANILA, Philippines — Handang ibanderang muli ng mga dating national team players ang bandila ng Pilipinas sakaling mabigyan ng pagkakataon kasunod ng suspensyon ng FIBA sa mga kasalukuyang Gilas Pilipinas players.
Ilan sa mga ito ay sina Greg Slaughter at Jeff Chan ng Ginebra, Raymond Almazan, Beau Belga ng Rain or Shine, Christian Standhardinger at Arwind Santos ng San Miguel.
Noong Huwebes ay ipinataw ng FIBA ang suspensyon kina Andray Blatche, Japeth Aguilar, Calvin Abueva, Matthew Wright, Jayson Castro, Terrence Romeo, Roger Pogoy, Troy Rosario, Carl Bryan Cruz at Jio Jalalon.
Ang naturang suspensyon ang nagresulta sa paghahanap ng posibleng kapalit na manlalaro dahil sa second round ng 2019 FIBA World Cup Asian Qualifiers sa Setyembre kung saan makakasagupa ng Gilas ang Iran, Kazahkstan at Qatar.
Isa sa original member ng Gilas Pilipinas na binuo noong 2010 ay si Slaughter.
“I’m ready and waiting to be in the national team again. There’s a few times I went through some injuries that I couldn’t be able to join but now I’m healthy and would love to play again,” aniya.
Gayundin ang kahandaan ni Chan na miyembro ng 2014 World Cup team maging sina Almazan at Belga.
Wala ring alinlangan si Standhardinger na tinitingnang papalit sa puwesto ni Blatche bilang naturalized player, habang sabik ding makabalik sa national team ang 36-anyos na si Santos buhat nang huli itong maglaro sa Powerade-Pilipinas noong 2009 sa ilalim ni head coach Yeng Guiao.
Lumutang din ang pangalan ng breakout player at segunda sa Best Player of the Conference race na si Vic Manuel ng Alaska.
Wala pang konkretong hakbang ang Samahang Basketbol ng Pilipinas kung sino ang mga nais nilang manlalaro na isasama kina June Mar Fajardo, Gabe Norwood at Baser Amer.
Makikipag-usap ang SBP sa PBA sa mga susunod na araw para sa kanilang mga plano.
Nakatakda ring magpulong ang PBA Board of Governors kasama si Commissioner Willie Marcial upang talakayin ang tulong na ibibigay ng liga sa SBP at sa Gilas Pilipinas.
- Latest