Pacquiao nagkaproblema sa puso

MANILA, Philippines – Isang linggo bago hamunin si Lucas Matthysse ng Argentina ay nahirapan sa kanyang paghinga si Filipino boxing icon Manny Pacquiao.

Sinabi kahapon ni Pacquiao na isang posibleng heart complication ang natuklasan sa isa niyang regular check-up.

“Siyempre to make sure na bago lumaban, walang diperensya, wala tayong problema,” ani Pacquiao. “So, nag-undergo tayo ng angiogram, one week before the fight.”

Sa bisperas ng kanilang upakan ng 35-anyos na si Matthysse sa Axiata Arena sa Kuala Lumpur, Malaysia ay bumalik ang 39-anyos na si Pacquiao sa Maynila para magpatingin sa Cardinal Santos Medical Center.

Sumailalim ang Filipino world eight-division champion sa angiogram, isang pagsusuri na nanga-ngailangan ng X-ray imaging para tingnan ang blood vessels sa puso.

“Sa treadmill ako tumakbo para tingnan din ‘yung heart ko, Iyong blood ko, wala man,” litanya ni Pacquiao. “Kung may nakitang bara, diretso na siya, operahan na diretso kaagad. Pero wala naman, tapos nag-approve naman ang doctor.”

Kung may bara sa kanyang blood vessels sa puso ay inaasahang ipagpapaliban ang laban ni Pacquiao kay Matthysse.

Noong Linggo ay tinalo ni Pacquiao si Matthysse via seventh-round TKO victory para agawin sa boxing star ng Argentina ang suot nitong World Boxing Association welterweight crown.

Hindi ipinaalam ni Pacquiao sa kanyang pamilya ang pagsailalim sa angiogram para lamang matuloy ang laban nila ni Matthysse.