Fajardo namumuro sa 5th MVP

MANILA, Philippines — Kung hindi magkakaroon ng anumang injury ay inaasahang makakamit ni San Miguel star center June Mar Fajardo ang kanyang record-breaking na pang-limang sunod na PBA MVP award.

Mula sa nakaraang 2018 PBA Philippine Cup hanggang sa quarterfinals ng Commissioner’s Cup ay bumabandera si Fajardo sa statistical race sa likod ng kanyang 29.6 average statistical points (SPs).

Nauna nang nakuha ng four-time PBA MVP ang Best Player of the Conference ng 2018 PBA Philippine Cup.

Kaagaw naman ng 6-foot-10 Cebuano giant para sa kanyang record-setting na pang-pitong BPC award sa Commissioner’s Cup si Alaska star forward Vic Manuel.

Nagposte si Fajardo ng 38.77 SPs sa mid-season tournament.

Sakaling makamit ng 28-anyos na miyembro ng Gilas Pilipinas ang BPC trophy ng PBA Commissioner’s Cup at ng darating na Governor’s Cup ay awtomatiko nang masisikwat ni Fajardo ang pang-limang sunod niyang PBA MVP award.

Dahil dito ay masasapawan ni Fajardo sina PBA legends Ramon Fernandez at Alvin Patrimonio na may tig-apat na MVP trophy.

Samantala, ang iba pang nasa Top 5 sa MVP race ay sina Globalport guard Stanley Pringle (25.3 SPs), Ginebra forward Japeth Aguilar (23.6 SPs) at sina Arwind Santos (23.4 SPs) at Alex Cabagnot (22.0 SPs) ng San Miguel.

Nasa Top 10 din sina Sean Anthony (21.9 SPs) ng Globalport, Matthew Wright (21.8 SPs) ng Phoenix, Marcio Lassiter (21.2 SPs) ng San Miguel, Manuel (20.8 SPs) at TNT Katropa guard Jayson Castro (20.5 SPs).

Nangunguna naman sa PBA Rookie of the Year race si Phoenix forward Jason Perkins’ na may 15.10 SPs kasunod sina Raymar Jose (9.94 SPs) ng Blackwater at Robbie Herndon (9.09 SPs) ng Magnolia.