Mainit na ang Ginebra, Rain Or Shine

MANILA, Philippines — Dahil sa pagpapaliban sa kanilang bakbakan ng Barangay Ginebra sa Game Two noong Martes ay inaasahang nakagawa na si Rain or Shine coach Caloy Garcia ng magandang game plan.

“We were all able to see it on video and we have made the adjustments,” sabi ni Garcia sa 89-102 kabiguan ng kanyang Elasto Painters kontra sa Gin Kings sa kanilang series opener noong Linggo.

Hangad ng Rain or Shine na maitabla ang serye sa pagsagupa sa Ginebra ngayong alas-7 ng gabi sa Game Two ng kanilang best-of-five semifinals series sa 2018 PBA Commissioner’s Cup sa Smart Araneta Coliseum.

“We remain positive and understand it’s just a matter of exerting more effort and being more disciplined,” ani Garcia, muling aasahan sina import Reggie Johnson, two-time PBA MVP James Yap, Gabe Norwood, Beau Belga, Raymond Almazan at Maverick Ahanmisi para sa Elasto Painters.

Target naman ng Gin Kings na maiposte ang ma-laking 2-0 bentahe kagaya ng inilista ng nagdedepensang San Miguel Beermen kontra sa Alaska Aces.

Sa naturang panalo ng Ginebra sa Game One ay humakot si resident import Justin Brownlee ng 35 points, 14 rebounds at 9 assists habang humugot si Jeff Chan ng 10 sa kanyang 21 points sa fourth quarter laban sa dati niyang koponang Rain or Shine.

“We just got to be prepared and we can’t let our guard down from the beginning of the game,” wika ni Gin Kings seven-foot center Greg Slaughter sa pagresbak ng Elasto Painters.

Nauna nang ipinagpaliban ni PBA Commissioner Willie Marcial ang Game Two ng Ginebra at Rain or Shine at ang Game Three ng San Miguel Beermen at Alaska dahil sa pananalasa ng bagyong ‘Henry’.