2-0 bentahe hangad ng San Miguel

MANILA, Philippines — Alam ni head coach Leo Austria ang kaha-lagahan ng pag-angkin sa Game One ng isang serye.

“In any series, it’s always important to win Game One. We wanted to win the game to dictate the tempo and for them to think hard for their adjustment,” wika ni Austria.

Sinikwat ng nagdedepensang San Miguel ang 92-79 panalo sa Game One para ilista ang 1-0 bentahe sa kanilang best-of-five semifinals series ng karibal na Alaska Aces sa 2018 PBA Commissioner’s Cup noong Sabado.

Pipilitin ng Beermen na maitayo ang mala-king 2-0 kalamangan sa muling pagharap sa Aces sa Game Two ngayong alas-7 ng gabi sa Smart Araneta Coliseum.

Sakaling manalo sa Alaska ay makakalapit ang San Miguel sa kanilang PBA record na pang-40 Finals appearance.

“We still need two more. We’re gonna take care of things, and we’ll play with more energy,” wika ni shooting guard Marcio Lassiter, bumida sa naturang pagdaig ng Beermen sa Aces kasama sina import Renaldo Balkman, four-time PBA MVP June Mar Fajardo, Arwind Santos at Alex Cabagnot.

Humakot naman si reinforcement Diamon Simpson ng 31 points, 24 rebounds, 5 steals at 2 blocks para sa Alaska.

“They played hard. They played great. We have to come out more aggressive than the next game and do our best,” ani Simpson, gumiya sa Aces sa korona ng PBA Fiesta Cup noong 2010.

Nilimitahan ng San Miguel si star forward Vic Manuel sa 16 markers na tumapos sa kanyang pagtatala ng 11 sunod na 20-point games.

Habang sinusulat ang balitang ito, kasaluku-yang naglalaban ang Rain or Shine at Ginebra sa Game-One ng kanilang sariling best-of-five semifinal series sa Mall of Asia Arena sa Pasay City kagabi.