Pacquiao asam ang welterweight title
KUALA LUMPUR – Ngayong araw ay patutunayan ni Filipino boxing icon Manny Pacquiao na kaya pa rin niyang manalo ng isang world boxing crown.
Ito ay sa kabila ng apat niyang kabiguan sa huling siyam na laban at ang pag-akyat niya sa edad na 40-anyos sa Disyembre 17.
“We will see after this fight if I can still continue fighting,” sabi ni Pacquiao sa bisperas ng pinakamalaking boxing event sa Malaysia matapos ang upakan nina Muhammad Ali 43 taon na ang nakakalipas.
Pipilitin ni Pacquiao na agawin sa 35-anyos na si Lucas Matthysse ng Argentina ang bitbit nitong World Boxing Association welterweight belt sa Axiata Arena rito.
Isinuko ni Pacquiao ang kanyang dating hawak na WBO welterweight title kay Jeff Horn noong Hulyo ng 2017 sa Brisbane, Australia kung saan nakita ng mga kritiko ang kabiguan ng world eight-division champion na tapusin ang 29-anyos na school teacher sa ilang pagkakataon.
Sa 16,000-seat arena at sa harap ni Presidente Rodrigo Duterte ay susubukan ni Pacquiao na ipaalala sa kanyang mga fans ang dati niyang bilis at lakas sa paghahamon kay Matthysse.
Personal na inimbitahan ng fighting senator si Malaysian Prime Minister Mahathir Mohamad para panoorin ang kanyang laban kasama ang mga libu-libong Pinoy fight fans.
Puntirya ni Pacquiao ang kanyang ika-60 panalo (59-7-2) sapul nang maging pro boxer noong 1995 laban sa 35-anyos na si world weltetweight king mula sa Argentina na mayroong 36 knockouts sa 39 panalo.
Ayon kay Matthysse, isang pangarap na natupad na makalaban sa ibabaw ng boxing ring si Pacquiao.
- Latest