Matthysse may mensahe Kay Pacquiao

KUALA LUMPUR – Sinabi ni WBA welterweight champion Lucas Matthysse na hindi pa nakakalaban ni Manny Pacquiao ang isang katulad niya.

Maaaring tama si Matthysse dahil siya ang magi-ging pinakamabigat na puncher na makikipagsuntukan kay Pacquiao sa Linggo sa Axiata Arena.

Ang katanungan lamang ay kung makakakonekta ang 35-anyos na Argentinian kay Pacquiao.

“Pacquiao is a great fighter, but he hasn’t faced ‘The Machine’ yet,” wika ng reigning titlist sa press conference kahapon sa Hilton Hotel.

Tinawag na “La Maquina,” dadalhin ni Matthysse sa ibabaw ng ring ang mataas na knockout percentage laban kay Pacquiao.

Sa 39 panalo ni Matthysse, 36 dito ay knockout.

“I’m honored to face him (Pacquiao). But I’m here to defend my title,” wika ni Matthysse ng Chubut, Argentina.

Sa pagsagupa kay Pacquiao ay inaasahang tatanggap si Matthysse ng $2 milyon.

“We got everything ready to go. Lucas Matthysse is not here for a paycheck. He is here to bring his title back to his people,” wika ni Joel Diaz, ang leadtrainer ni Matthysse.

Sinabi naman ni Pacquiao na pinili niya si Matthysse dahil sa istilo nito.

“I believe we can have good action in the ring so the fans will be happy,” sabi ni Pacquiao, nagmula sa unanimous decision loss kay Australian Jeff Horn noong Hulyo, 2017 sa Australia.

Nakatakda ang official weigh-in bukas.

Samantala, naniniwala si Oscar De La Hoya ng Golden Boy Promotions na mananalo si Pacquiao sa puntos habang isang knockout win naman ang maitatala ni Matthysse.

“If Manny Pacquiao wins, he wins by decision. If Lucas Matthysse wins, he wins by knockout,” sabi ni De La Hoya sa mga Filipino scribes kahapon sa 27th floor Club Lounge ng Le Meridien Hotel.

Nagretiro si De La Hoya, promoter ni Matthysse noong 2008 makaraan ang one-sided loss kay Pacquiao.