Suarez pasok din sa quarterfinals
MANILA, Philippines — Nakahirit din ng tiket sa quarterfinals si Incheon Asian Games silver medallist Charly Suarez matapos magtala ng pahirapang panalo kahapon sa 2018 President’s Cup International Boxing Tournament na ginaganap sa Daulet Sports Complex sa Astana, Kazakhstan.
Naitala ni Suarez ang 3-2 decision laban kay Hursand Imankuliyev ng Turkmenistan sa second round ng men’s lightweight (60 kg.).
Pare-parehong nagtala ng 29-28 ang tatlong huradong pumabor kay Suarez mula sa dalawang Kazakhstan judges (Kazin at Zhumankulov) at mula Tajikistan (Umarov) habang nakuha ni Imankuliyev ang boto ng Indian (Farkhad) at Russian (Radnaev) na may magkatulad na 29-28.
Makakalaban ni Suarez sa quarterfinals si Shunkor Abdurasulov ng Uzbekistan na nagtala ng 4-1 panalo kontra kay Sur Toltayev ng Kazakhstan sa hiwalay na second-round bout.
Nakatakda ring sumabak si Caroline Calungsod kontra kay Jitpong Jutamas ng Thailand sa opening round ng women’s 57 kg. nitong Huwebes ng gabi.
Nauna nang humirit ng tiket sa quarterfinals sina Rogen Ladon sa men’s flyweight (52 kg.) at Ramel Macado sa men’s light flyweight (46-49 kg.) matapos makatiyak ng first-round bye sa kani-kaniyang dibisyon.
Susuntok ngayong araw sina 2017 Southeast Asian Games champion Marvin John Tupas (men’s light heavyweight – 81 kg.) at Jeorge Edusma (men’s bantamweight - 56 kg.)
Makakalaban ni Tupas Nurmagambet Bi ng Kazakhstan na umiskor ng 5-0 unanimous decision kay Chen Daxiang ng China habang lalarga si Edusma kontra kay Xu Boxiang ng China.
- Latest
