‘Di na pinakawalan ng host Cebu City

CEBU CITY, Philippines — Hindi na pinakawalan pa ng host Cebu City ang overall championship trophy matapos umani pa ng pitong gintong medalya mula sa huling araw kahapon  sa 9th Philippine National Games sa Cebu City Sports Center dito.

 Humakot pa ang mga Cebuano athletes ng dalawa sa arnis at tig-isang ginto mula sa lawn tennis, sepak takraw at duathlon para umangat sa 38-51-58 gold-silver-bronze medal haul as of 4:p.m. kahapon habang sinusulat ang balitang ito at abot kamay na ang P10 million top prize sa unang pagkakataon simula 1994.

Kahit hindi pa tapos ang kumpetisyon sa dancesports, women’s volleyball at boxing as of presstime,  halos sa mga Cebuanos na ang titulo dahil sa kakulangan ng entries mula sa mga mahigpit na kalabang  Baguio City at Mandaluyong.

Nauna ng umani ang host City ng 12 ginto sa athletics, apat sa weighlifting, apat sa taekwondo at tig-tatlo sa swimming, lawn tennis at cycling, tig-dalawa sa arnis, weighlifting at karatedo para sa liderato.

Ang overall champion ay makakatanggap ng kabuuang P10 million mula sa Philippine Sports Commission at kay Pa-ngulong Rodrigo Duterte habang P8 million sa first runner-up, P6 million sa second runner-up, P4 million sa third runner-up at ang fifth placer ay mag-uuwi ng P2 million.

“For our victory it’s really heart comes first. Medals will follow later. That’s our philosophy. That’s why, it’s a blessing and opportunity for our athletes to win gold medals for the city. They worked so hard, so it’s very heart-warming,” sabi ni Cebu City Sports Commission chairman Edward Hayco.

Samantala, kagaya ng inaasahan, winalis ng mga miyembro ng national team ang limang ginto sa badminton event sa Metro Sports sa Barangay Lahug sa panalo nina Joy Barredo sa women’s singles at  So-lomon Padiz Jr. naman sa men’s singles, ang tandem nina Alvin Morada at Ysabel para sa mixed doubles, at ang pares nina Anton Cayanan at Joper Escueta sa men’s doubles.

Nagwagi rin ang Cebu Province sa men’s beach volleyball sa Fort San Pedro habang dinomina naman ng Davao del Norte ang women’s division.

Sa archery sa Danao City track oval, sinorpresa naman ng 18-anyos na si Kereel Hongitan ng Baguio City ang World Youth Olympic-bound na si Nicole Tagle ng Dumaguete sa women’s open recurve 72 arrows, 628-617.