Pamintuan, La Torre tig-4 gold medals na

CEBU City, Philippines — Lumangoy pa ng tig-isang gintong medalya sina Nicole Meah Pamintuan at Camilo Russel La Torre kahapon upang iangat sa apat ang kanilang koleksyon sa 9th Philippine National Games sa Cebu City Sports Center dito.

Muling rumatsada ang 18-anyos na si Pamintuan ng Sta. Rosa City, Laguna sa 100-m backstroke (1:09.81) upang masungkit ang pang-apat na panalo kabilang na ang tatlo sa unang araw ng kumpetisyon noong Linggo kung saan dinomina niya ang 100-m freestyle (1:02.12), 50-m backstroke (32.64) at 200-m individual medley (2:32.87).

“I hope my performance here would be enough to convince our officials to include me in the national team for the Asian Games this August,” sabi ng estudyante ng De La Salle-Zobel na si Pamintuan na isang  bronze medalist sa 29th Southeast Asian Games noong nakaraang taon sa Kuala Lumpur.

Hindi naman nagpahuli ang 18-anyos na si La Torre ng Gen. Santos City matapos magwagi sa 400-m freestyle (4:28.49) para sundan ang kanyang panalo sa 400-m individual medley (5:08.81) noong isang araw.

Ang ibang ginto ni La Torre ay mula sa 100-m freestyle (57.87) at sa 1,500-m freestyle (18.21.03) noong Linggo. Tiyak ni  La Torre na madagdagan pa ng dalawa ang kanyang koleksyon sa paglangoy pa niya sa 800-m IM at 200-m IM ngayong araw.

Bukod sa dating Palarong standouts na sina Pamintuan at La Torre, may tig-tatlong ginto na rin sina David Franco De La Rosa ng Las Piñas at Kelsey Claire Jaudian ng Gen. Santos City.

Tigalawang ginto naman sina Lean Ysidore Dagum ng Koronadal (100-m backstroke at 100-m butterfly), John Samuel Alcos ng Davao City (200-m backstroke at 50-m breaststroke) at Karen Mae Indaya ng Cebu City (400-m medley relay at 200-m backstroke).

Nag-umpisa nang lumayo ang host Cebu City sa medal tally pagkaraang humakot ng kabuuang 15-16-16 gold-silver-bronze sa tatlong araw pa lamang ng kompetisyon. Karamihan sa panalo ng “Queen City of the South” ay mula sa athletics (7) dagdag ang panalo sa  cycling (2), swimming (3), weighlifting (2) at arnis (1).

Sa judo, ipinakita rin nina Filipino-Japanese twins Shugen at Kensei Nakano ng Pasay City na dapat isama sila sa national team para sa Asian Games matapos magwagi sa finals sa magkahiwalay na laban sa SM Seaside SRP.

“We are impressed by their victories via ippon. We are closely monitoring their matches because it will give us an idea on who we will recommend for the Asian Games,” ayon kay Philippine Judo Federation president Dave Carter.

Pinanindigan naman nina Harry Diones (men’s triple jump), Rhea Joy Sumalpong (women’s discuss throw) at Rosie Villarito (women’s javelin throw) ang kanilang slots sa national team sa kanilang magaang panalo sa magkahiwalay na event sa athletics.