Patakaran ng MPBL pinalagan ng mga Fil-foreign players
MANILA, Philippines – Dinagsa ng kritisismo ang Maharlika Pilipinas Basketball League (MPBL) sa gitna ng kontrobersyal na patakaran nito kaugnay ng mga Filipino-foreign players.
Ayon sa panuntunan ng liga, isang Fil-foreign na dapat din ay 6-foot-4 lamang ang maaaring maglaro kada isang koponan.
Idiniin ito ni Commissioner Kenneth Duremdes sa isang panayam sa Fox Sports matapos ang pagkuha ng Mandaluyong El Tigre sa dalawang Filipino-Americans na sina Bobby Rayray Parks Jr. at Lawrence Domingo.
Aniya, ito ay upang mapanatili ang balanse ng liga na ang pangunahing mandato nang itayo noong 2017 ay mabigyan ng tsansa at exposure ang mga homegrown at purong Pinoy ma manlalaro na hindi pinalad sa professional basketball.
Paraan din ito upang hindi matabunan ang talento ng mga Pinoy laban sa mga Fil-Foreign cagers, ayon pa kay Duremdes.
Hindi ito nagustuhan ng ilang manlalaro lalo na ng mga Fil-foreign players na nakapagtayo na ng pangalan sa bansa lalo na sa Philippine Basketball Association.
Binira nina retired players Rob Reyes, Jeff Cariaso, Ali Peek at Gabe Norwood gayundin si naturalized player Marcus Douthit ang batas na ito ng MPBL na ayon sa kanila ay hindi makatarungan dahil kahit pa Fil-foreign ay Pinoy pa rin ang mga ito.
“At what point do we acknowledge that sports leagues are not above the law?! If you hold a Philippine passport, you’re a Filipino with all the rights,” ani Reyes.
“New league allows 1 Fil-Am per team, has to be 6’4 or under! What are you guys scared of! We’re here to stay and will keep coming,” dagdag naman ni Peek.
Taliwas naman sa akala ng MPBL na mawawalan ng balanse ang liga kung dadamihan ang Fil-foreigners.
Sinabi ni Norwood ng Rain or Shine na wala namang pinagkalayo ang talento ng purong Pinoy at Fil-foreign players.
Wala ring Fil-foreign na nagwagi ng MVP sa PBA sa nakalipas na 10 taon.
- Latest
