Gillenwater papalitan na ng Beermen?
MANILA, Philippines — Sa gitna ng maalat na 0-2 simula, pinag-iisipan ng defending champion na San Miguel kung magpapatuloy ba sila kasama si import Troy Gillenwater sa kanilang title retention bid sa 2018 PBA Commissioner’s Cup.
Iyan ang inamin ni head coach Leo Austria matapos ang panibago na naman nilang kabiguan, sa pagkakataong ito, ay kontra sa rumaragasang Rain or Shine, 119-123 sa overtime, kamakalawa ng gabi sa Ynares Sports Center sa Antipolo City.
Malaking bahagi ang maagang pagkawala ng 6’9 na si Gillenwater matapos ma-eject nang mabangga niya si referee Rey Yante.
Um-exit siya sa ikalawang kanto pa lamang tangan ang 11 puntos, tatlong rebounds, isang assist at isang steal sa 14 minutong aksyon lamang.
“We’ll have to think about it. We have to evaluate. Kahit sinong player, kahit anong team naman, we have to evaluate kung helpful o hindi,” ani Austria.
Hindi kumbinsido si Austria sa ipinapakita ni Gillenwater na nagrerehistro ng 15 puntos at 8.5 rebounds lamang sa kanyang unang dalawang laro – bagay na ayon sa batikang head coach ay malayo kumpara sa ibang super imports ng ibang koponan.
“Compared to the other imports, we’re not impressed,” diin niya.
Bunsod nito, lalong nagningas ang usap-usapan ng posibleng pagsibak kay Gillenwater at ang pagdating ni Charles Rhodes o kaya’y ni Renaldo Balkman upang palitan siya.
Si Rhodes ang gumabay sa Beermen noong nakaraang taon tungo sa titulo ng Commissioner’s Cup kung saan siya rin ang tinanghal na Best Import.
Sa kabilang banda, si Balkman naman ang nagsilbing import ng SMB (dating Petron) noong 2013 kung kailan siya natampok sa kontrobersyal na choking incident sa teammate na si Arwind Santos upang mabigyan ng lifetime ban sa PBA.
Ngunit sa kanyang pagbabalik ngayong taon sa Pilipinas limang taon matapos ang insidente ay tila redemption ang nakumpleto ni Balkman nang personal na humingi na ng paumanhin sa PBA na pinamumunuan ngayon ni Commissioner Willie Marcial.
Natanggal ang kanyang lifetime ban at bilang sukli ay pinag-igihan pa lalo ni Balkman hanggang sa makumpleto ang redemption nang dalhin sa kampeonato ang SMB-Alab Pilipinas sa kauna-unahan nitong kampeonato sa ABL.
“I’m not sure. We don’t know yet. Probably in a couple of days, may result na. The good thing is we have five days if ever magre-replace kami. Pag-uusapan pa namin iyon,” aniya.
Lalabanan ng Beermen ang Alaska Aces sa Sabado sa Dumaguete City.
- Latest