Gilas cadets sasagupa sa Bulldogs
MANILA, Philippines — Susubukan ng Gilas Pilipinas na makabawi mula sa kabiguan sa krusyal na pakikipagtuos sa National University sa 12th Filoil Flying V Pre-season Premier Cup sa Filoil Flying V Centre sa San Juan City.
Nakatakda ang sagupaan sa pagitan ng Gilas (1-4) at Bulldogs (1-3) ngayong alas-7 ng gabi at ang mananalo ay mapapaganda ang kanilang kartada papalapit sa dulo ng eliminasyon.
Kagagaling lamang sa panalo kontra sa University of Perpetual Help System-Dalta dalawang linggo na ang nakakaraan, muling dumapa ang Gilas sa mga kamay ng University of the Philippines, 72-78, noong Martes.
Lumamang ang Gilas ng hanggang sa 16 puntos ngunit kagaya ng mga naunang kabiguan ay tumirik ulit sa dulo bunsod ng kakulangan sa karanasan bilang isang buong koponan.
Repleksyon ito ng patuloy na paghahanap pa rin ng Gilas ng chemistry na siyang susubukan nilang ipamalas laban sa Bulldogs.
Kabubuo lamang noong nakaraang buwan at selection ng mga collegiate at amateur players, iginiit ni coach Jong Uichico na hindi nila hangad ang panalo bagkus ay paghahanda ang kanilang habol sa torneo.
Ang Gilas cadet pool ay ang kakatawan sa Pilipinas sa hinaharap lalo na sa 2023 International Basketball Federation (FIBA) World Cup na gaganapin sa bansa.
- Latest
