Hotshots lusot sa Batang Pier
MANILA, Philippines – Hindi si import Vernon Macklin ang sinandigan ng Hotshots sa mahalagang bahagi ng final canto.
Nagtuwang sina Paul Lee at Ian Sangalang sa huling tatlong minuto ng fourth quarter para akayin ang Magnolia sa 92-87 panalo laban sa Globalport sa 2018 PBA Commissioner’s Cup kahapon sa Angeles University Foundation Gym sa Angeles, Pampanga.
Tumapos si Sangalang na may 22 points para banderahan ang panalo ng Hotshots sa dalawang laro, habang nagdagdag sina Macklin at Rome Dela Rosa ng 19 at 14 markers, ayon sa pagkakasunod.
Nadiskaril naman ang hangad na pangatlong sunod na pananalasa ng Batang Pier, nakahugot kay Sean Anthony ng 20 points.
Ang three-point play ni Anthony ang nag-akay sa Globalport sa 85-83 abante sa 3:53 minuto ng fourth period bago tumipa si Sangalang ng isang semi hook shot na sinundan ng drop shot ni Lee para sa 88-85 kalamangan ng Magnolia sa huling 2:27 minuto.
Makaraan ang basket ni Sangalang para sa 90-85 bentahe ng Hotshots ay kumonekta si Stanley Pringle ng dalawang free throws para sa 87-90 agwat ng Batang Pier sa natitirang 58.9 segundo.
Isang free throw ang ipinasok ni Macklin para sa Magnolia at naimintis naman ni Pringle ang kanyang layup para sa Globalport sa huling 30 segundo.
Samantala, puntirya ng TNT Katropa ang ikaapat na sunod na panalo sa pagsagupa sa Alaska ngayong alas-4:30 ng hapon sa Ynares Center sa Antipolo City.
“Big test for us going up against a disciplined team team like Alaska,” wika ni Tropang Texters coach Nash Racela. “We hope to play with a lot of patience and look forward to performing well again.”
Sa ikalawang laro sa alas-6:45 ng gabi ay magpipilit namang makabawi ng nagdedepensang San Miguel mula sa nauna nilang kabiguan sa pagharap sa Rain or Shine.
Nagmula ang Beermen ng 85-93 pagkatalo sa Meralco Bolts sa kanilang unang laro noong Miyerkules kung saan natunghayan si No. 1 overall pick Christian Standhardinger na tumapos na may 4 points, 5 rebounds, 2 assists at 2 steals.
- Latest