Pang-16 All-Star na ni Taulava

MANILA, Philippines – Matapos ang 19 taon ay bahagi pa rin si NLEX veteran center Asi Taulava ng PBA All-Star.

Gagawin ng 45-anyos na si Taulava ang kanyang record na ika-16 All-Star game ngayong season sa pagbandera niya sa PBA Visayas selection na sasagupa sa Gilas Pilipinas sa final leg ng annual event sa Mayo 27 sa Iloilo City.

Ang Fil-Tongan ang may pinakamahabang All-Star stint sa league history.

“I lost track of it,” sabi ng 6-foot-10 na si Taulava. “But it’s always an honor to be part of the All-Star weekend. The All-Star has always been an outreach program for us players to give back to the fans.”

Tatlong beses lamang hindi nakasama ang NLEX big man sa All-Star sa kanyang career na nangyari noong 2000 (Iloilo), 2013 (Digos) at 2014 (Mall of Asia Arena).

Maglalaro si Taulava sa kanyang ikaapat na sunod na PBA All-Star appearance bilang bahagi ng koponan ni Magnolia coach Chito Victolero sa final phase ng three-leg tour.

Isa sa mga kakampi ni Taulava sa Visayas team ay si James Yap ng Rain or Shine na nasa kanyang pang-15 sunod na PBA All-Star.

“Some people take it for granted, but throughout my whole career, I always appreciate it. This means a lot,” wika ni Taulava, dalawang beses hinirang na All-Star MVP noong 2004 at 2006. “It’s like second best to winning a championship.”

Magsisimula ang 2018 All-Star edition sa Mayo 23 sa Digos, Davao del Sur kung saan lalabanan ng PBA Mindanao selection ni Tim Cone ng Ginebra ang Gilas.

“It is with pride and honor to host the opening leg of this year’s All-Star in the city of Digos, Davao del Sur, which has been a long-time partner of the PBA after staging several games of the league in the province during the past,” sabi ni Davao del Sur Governor Douglas Cagas.

Sa Mayo 25 ay dadalhin naman ang PBA All-Star sa Batangas City para sa second leg na tatampukan ng pagharap ng Philippine squad sa PBA Luzon All-Star.