Cleveland angat sa 2-0

TORONTO — Humataw si LeBron James ng 43 points at 14 assists habang nagdagdag si Kevin Love ng 31 points at 11 rebounds para banderahan ang Cleveland Cavaliers sa 128-110 paggiba sa Raptors sa Game Two ng kanilang Eastern Conference semifinals series.

Nag-ambag si J.R. Smith ng 15 points kasunod ang 14 at 13 markers nina Jeff Green at George Hill, ayon sa pagkakasunod para sa 2-0 bentahe ng Cleveland kontra sa Toronto.

Humakot pa si James ng 8 rebounds na dumiskaril sa kanyang ikalawang sunod na triple-double.

Bumida naman si DeMar DeRozan para sa Toronto mula sa kanyang 24 points kasunod ang 21 markers ni Kyle Lowry.

Nagposte ang Raptors ng team-record na 59 panalo para maging top-seeded team sa Eastern Conference ngayong season, ngunit itinulak nina James at ng Cavaliers sa isa na namang postseason exit.

Kumolekta si Jonas Valanciunas ng 16 points at 12 rebounds habang nagdagdag si Fred VanVleet ng 14 points para sa back-to-back home games loss ng Toronto.

Dadalhin ang Game Three sa Cleveland sa Linggo (Manila time) kung saan may 0-5 record ang Toronto sa huling dalawang postseasons at natalo ng average margin na 24.2 points per game.

Sa Boston, pinamunuan ni Terry Rozier ang ratsada ng Celtics sa fourth quarter para bumangon mula sa 22-point deficit at resbakan ang Philadelphia 76ers, 108-103, sa Game Two ng kanilang semis showdown.

Ipinoste ng Boston ang 2-0 abante sa kanilang serye ng Philadelphia, iho-host ang Game Three sa Linggo (Manila time).

Sa likod ni JJ Redick ay naitala ng 76ers ang 48-26 bentahe sa second period hanggang makabangon ang Celtics na tinampukan ng 8-0 atake ni Rozier at slam dunk ni Jayson Tatum para sa kanilang 104-97 bentahe sa huling dalawang minuto ng fourth quarter.

Matapos makalapit muli ang Philadelphia sa three-point deficit ay nagsalpak naman si Al Horford ng layup laban kay Joel Embiid at kumonekta si Tatum ng dalawang free throws para selyuhan ang panalo ng Boston.

Umiskor si Tatum ng 21 points para sa Boston kasunod ang 20 at 19 markers nina Rozier at Marcus Smart, ayon sa pagkakasunod.