Pacquiao-Matthysse fight sa US pay-per-view

MANILA, Philippines — Nang labanan ni Manny Pacquiao si Jeff Horn noong Hulyo ng 2017 sa Brisbane, Australia ay itinuring itong highest rated boxing card ng nasabing taon at highest rated fight sa cable simula noong 2006.

Ang naturang laban nina Pacquiao at Horn ay isinaere ng Top Rank Promotions ni Bob Arum katuwang ang cable network na ESPN.

Sinabi kahapon ni Arum sa panayam ng BoxingScene.com na gusto ng Filipino world eight-division champion na gawin ang kanilang upakan ni world welterweight king Lucas Matthysse ng Argentina sa Hulyo 15 (Manila time) sa ‘pay-per-view’.

“We left that decision up to Manny and he wants it to be on pay-per-view,” wika ni Arum kay Pacquiao na tumatayong promoter ng nasabing laban sa pamamagitan ng kanyang MP Promotions.

Ang Top Rank ay hindi magpo-promote ng bakbakan ng 39-anyos na si Pacquiao at ng 35-anyos na si Matthysse kundi siyang magpapalabas ng nasabing event sa America katulong ang ESPN.

“What we’re going to do on July 14th is we have a linear ESPN show that’s going to precede the pay-per-view and then we’re going to switch to Malaysia and do two championship fights and Pacquiao on pay-per-view,” paliwanag ni Arum.

Hahamunin ni Pacquiao si Matthysse para sa suot nitong World Boxing Association welterweight belt sa Hulyo 15 sa Axiata Arena sa Kuala Lumpur, Malaysia.

“The linear ESPN card will be a full ESPN show but it will be reminding the viewers to buy the pay-per-view,” dagdag pa ng veteran promoter.

Ito ang unang pagkakataon na muling aakyat sa boxing ring si Pacquiao matapos matalo kay Horn via unanimous decision at maisuko ang hawak na World Boxing Organization welterweight title.

Sinimulan na ni Pacquiao ang kanyang pag-eensayo kasama ang kababatang si Buboy Fernandez na hinirang niyang chief trainer kasabay ng pagbitaw kay Hall of Fame trainer Freddie Roach.

“I am excited to return to the ring once again and face a dangerous champion in a difficult and challenging fight,” wika ng Senador.