Laban ni Ancajas kay Sultan ‘di na matutuloy

MANILA, Philippines — Hindi na matutuloy ang makasaysayang all-Filipino world title showdown sa pagitan nina super flyweight king Jerwin Ancajas at mandatory challenger Jonas Sultan.

Ito ay dahil sa pagkakakansela ng ikalawang title defense ni WBO welterweight titlist Jeff Horn (18-0-1, 12 KOs) ng Australia kontra kay American mandatory challenger Terence Crawford (32-0-0, 23 KOs) sa Abril 14 sa Mandalay Bay Resort & Casino sa Las Vegas, Nevada.

Nagkaroon si Crawford ng right hand injury habang nag-eensayo, ayon kay Bob Arum ng Top Rank Promotions.

Ang bakbakan nina Ancajas, ang kasaluku-yang International Boxing Federation super flyweight champion, at Sultan ay nasa undercard ng Horn-Crawford championship fight.

Ang nasabing pagdedepensa ni Ancajas (29-1-1, 20 KOs) ng kanyang IBF belt laban kay Sultan (14-3-0, 9 KOs) ay maaaring itakda sa Mayo o Hunyo, ayon sa ALA Boxing Promotions.

Nauna nang inilagay ni Arum ang comeback fight ni Filipino superstar Manny Pacquiao (59-7-2, 38 KOs) laban kay dating Mexican world light welterweight titlist Mike Alvarado (38-4-0, 26 KOs) sa undercard ng Horn-Crawford bout.

Ngunit mas minabuti ni Pacquiao na harapin si Lucas Matthysse (39-4-0, 36 KOs) ng Argentina sa Hunyo 24 sa Kuala Lumpur, Malaysia.

Dahil dito ay ipinalit ni Arum ang title defense ni Ancajas kontra kay Sultan sa undercard ng suntukan nina Horn at Crawford.