Nagsimula nang kumilos si Zubiri

MANILA, Philippines -  Kahit hinihintay pa niya ang opisyal na appointment mula kay Pangulong Rodrigo Duterte, taos puso namang tinanggap ni Sen. Juan Miguel Zubiri ang responsibilad  bilang chairman ng 2019 Philippine Sea Games Organizing Committee.

Nagpulong sina Philippine Sports Commission chairman William “Butch” Ramirez at Sen. Zubiri sa unang pagkakataon sa opisina nito sa Senado para sa inisyal na pag-uusap tungkol sa darating na ika-apat na hosting ng bansa ng biennial meet sa darating na 2019.

“We are waiting for the Executive Order appointing Sen. Zubiri as chairman of the organizing committee. As soon as the EO comes out, we will have meeting with the POC (Philippine Olympic Committee),” sabi ni Ramirez.

Ayon pa kay Ramirez napag-usapan na nila na sa Philippine International Convention Center (PICC) ilalagay ang secretariat ng Sea Games Organizing Committee at doon na gagawain ang mga meetings at iibahin na ang pangalan, hindi na ang dating Philsoc (Philippine Sea Games Organizing Committee) dahil sa nakabinbin na P27 million unliquidated expenses noong 2005.

“Very positive siya (Zubiri). He is excited but careful not to make mistakes. We can organize well because we have the experience, I think this will be more organized kasi noon (2005) mayroong away-away. Ngayon wala naman,” dagdag ni Ramirez.

Sabi rin ni Ronnel Abrinica, senior executive assistant ni Ramirez, ayaw ni Zubiri na siya ang tatanggap ng pera mula sa gobiyerno at ayaw din ni Ramirez na siya ang hahawak sa pera kaya napagkasunduan ng dalawang opisyales na gagawa ng Finance Committe na kasama ang Commission on Audit para humawak sa pera ng organizing committee.

Kung natatandaan, tumanggap ang Philsoc ng mahigit P167 million mula sa gobiyerno bilang tulong sa Sea Games noong 2005.

“Our meeting with Sen. Zubiri was very productive. We have a smooth discussion. I have assured him of 100 percent support from the PSC,” ayon kay Ramirez.

Nilinaw din ni Ramirez na mayroon silang hindi napagka-unawaan ni POC president Jose Cojuangco.

“There is a notion, we are in conflict, but we’re not. We may have disagreements on how to run things, but we’re not in conflict,” ani Ramirez.