Pacquiao umaasang makikipagsabayan si Horn
MANILA, Philippines - Bagama’t hindi niya kilala si Jeff Horn ay umaasa si Manny Pacquiao na lalaban nang sabayan ang Australian challenger sa kanilang bakbakan sa Hulyo 2 sa Suncorp Stadium sa Brisbane, Australia.
“I want an opponent that wants to fight toe-to-toe, throwing a lot of punches, aggressive,” wika ng 38-anyos na si Pacquiao na idedepensa ang suot na World Boxing Organization welterweight crown laban sa 29-anyos na si Horn.
Sinabi ng Filipino world eight-division champion na gusto niyang mapasaya ang 55,000 fans na manonood ng kanilang suntukan kaya umaasa siyang hindi tatakbo sa laban si Horn, isang da-ting school teacher.
“My style is to throw a lot of punches and I believe that will be very effective for Jeff Horn’s style. That’s why I accepted this fight,” ani Pacquiao.
Marami ang nagtaas ng kilay nang ihayag ni Bob Arum ng Top Rank Promotions ang laban nina Pacquiao at Horn noong Pebrero.
Ngunit kumpiyansa si Arum na pag-uusapan ang naturang title defense ni Pacquiao kontra kay Horn na nakikita niyang isang leon na gutom sa pagkain.
“This fight certainly has that theme,” sabi ni Arum.
Sa kanilang paghaharap sa kauna-unahang pagkakataon kamakalawa ay hindi naitago ni Horn ang paghanga niya kay Pacquiao.
Kaya naman aminado siyang dehado sa upakan nila ng Senador.
“He’s done so much. He’s fought a lot of champions,” wika ni Horn kay Pacquiao. But, “If he underestimates me, he’s going to know about it July 2. It’s going to be a very tough fight — he’s going to see that.”
Para paghandaan si Pacquiao ay pinapanood ni Horn ang mga laban ni ‘Pacman’ kay Mexican boxing legend Juan Manuel Marquez.
- Latest
