Paano gagawin ang draft para sa Gilas?

MANILA, Philippines – Anuman ang mangyari ay ang Blackwater pa rin ang pipili sa magiging No. 1 overall pick sa darating na 2016 PBA Rookie Draft sa Linggo sa Robinson’s Place sa Ermita.

Nakatakdang resolbahin bukas ng PBA Board of Governors ang usapin sa drafting order ng special draft para sa 12 miyembro ng Gilas Pilipinas.

Inaasahang kukunin ng Elite si 6-foot-4 power forward Mac Belo mula sa Gilas Pilipinas, habang maaaring pag-agawan ng ibang PBA teams sina 6’9 Arnold Van Opstal ng La Salle, Kevin Ferrer at Ed Daquiaog ng University of Sto. Tomas, Jio Jalalon ng Arellano at Mike Tolomia ng Far Eastern University.

Si Belo ang bumandera sa paghahari ng FEU Tamaraws sa nakaraang UAAP season at naging kamador ng Gilas Pilipinas 5.0 ni coach Josh Reyes sa 2016 FIBA Challenge Cup sa Tehran, Iran.

Sa regular draft ay ang Phoenix ang ikalawang pipili kasunod ang Barangay Ginebra, Mahindra, Star, San Miguel Beer, Meralco, NLEX, Rain or Shine, Ginebra, Alaska at Phoenix sa first round.

Huhugot naman sa second round ang NLEX, Rain or Shine, Globalport, Meralco, Alaska, Rain or Shine, Globalport, Phoenix, Rain or Shine, Mahindra, Alaska at Phoenix.

Ang iba pang nasa Gilas Pilipinas pool ay sina Roger Pogoy, Russell Escoto, Von Pessumal, Carl Bryan Cruz, Alfonso Gotladera at Matthew Wright.

Ang mga aspirants namang lalahok sa regular draft ay sina collegiate stars Gelo Alolino, Paolo Javelona, Mcjour Luib, Mikee Reyes at FIBA Asia Challenge campaigners Chris Javier at Jonathan Grey.

Nasa listahan din sina NCAA standouts Palo Pontejos, Jovit dela Cruz, Jamil Ortuoste, John Tayongtong, Jordan dela Paz, Al Francis Tamsi, Achie Inigo, Jeoffrey Javillonar, Levi Hernandez, Joseph Eriobu at Jammer Jamito.

Ang 55 aplikante ay sasailalim sa Draft Combine ngayon at bukas sa Gatorade Hoops Center kung saan sila ay hahatiin sa walong koponan na may tig-anim na players kasunod ang paghahayag ni PBA Commissioner Chito Narvasa ng final draftees.