Ginebra Gin Kings susuporta sa BGSM 3-on-3 National Championships
MANILA, Philippines - Bibisita ang mga miyembro ng Barangay Ginebra San Miguel Gin Kings para suportahan ang mga kasali sa kauna-unahang Barangay Ginebra San Miguel 3- on-3 National Championships na didribol ngayon sa SM North Edsa Sky Dome, Quezon City.
Ang Gin Kings, naghahanda para sa darating na 2016 PBA Governors’ Cup, ay makakahalubilo ng mga fans sa finals na magsisimula sa alas-10 ng umaga hanggang alas-5 ng hapon.
Ang naturang torneo ay libre para sa lahat.
Ang 16 koponan ay galing sa mga probinsiya ng Bulacan, Laguna, Tarlac, Quezon, Pampanga, Cavite, Cebu, Rizal, Davao, Bacolod at Pangasinan, at mga lungsod ng Pasig, Las Piñas, Quezon, Pasay at Mandaluyong.
Ang magkakampeon ay makakatanggap ng cash prize na nagkakahalaga ng P50,000 at ang runner-up ay mag-uuwi naman ng P20,000.
Ang programang ito ng Ginebra San Miguel Inc. (GSMI) ay nagbibigay ng pagkakataon sa mga mahihilig sa basketball na maipamalas ang kanilang galing at pagmamahal sa sport at matutunan na rin ang teamwork at sportsmanship.
Ang GSMI ay manufacturer ng No. 1 gin sa buong mundo, ang Ginebra San Miguel.
- Latest