Mas okay pa si Bradley kaysa kay Crawford

MANILA, Philippines – Hindi makakabuti kay Filipino world eight-division champion Manny Pacquiao na labanan si world light welterweight king Te­rence Crawford kung gusto nitong magretiro na may bitbit na panalo.

Sinabi ni veteran trainer Robert Garcia, dating cornerman ni world four-division title-holder Nonito ‘The Filipino Flash’ Donaire, Jr., na maaaring talunin ng 26-anyos na si Crawford ang 37-anyos na si Pacquiao para sa magiging pinakahuling laban nito sa Abril 9, 2016.

Kaya naman naniniwala si Garcia na mas pipiliin ni Pacquiao (57-6-2, 38 KOs) na muling sagupain ang world welterweight titlist na si Timothy Bradley, Jr. (33-1-1, 13 KOs) kesa kay Crawford (27-0-0, 19 KOs).

“I’d say he’s fighting Timothy Bradley for a third time. That’s just my guess. I think Crawford is just too risky to end his career with maybe a loss - even though Bradley has a shot this time of beating him for real,” wika ni Garcia kay Pacquiao.

Ginulat ni Bradley si Pacquiao sa kanilang unang laban matapos sikwatin ang kontrobersyal na split decision victory sa una nilang banggaan noong Hunyo ng 2012.

Bumawi naman si Pacquiao nang kunin ang kumbinsidong unanimous decision win sa kanilang rematch ni Bradley noong Abril ng 2014.

Matagumpay na naidepensa ni Bradley ang kanyang suot na World Boxing Organization welterweight makaraang ta-lunin si Brandon Rios via ninth-round TKO noong Nobyembre.

“We all saw the first two fights and thought Pacquiao won, but this time with Teddy Atlas...Bradley looked different, Bradley looked motivated. He might have that extra push to pull it off. And Pacquiao might not be the same anymore, so this time Bradley has a better chance to pull it off,” ani Garcia.

Napasama naman ang pangalan ni dating world four-division titlist na si Adrien ‘The Problem’ Broner (31-2-0, 23 KOs) sa listahan nang alukin siya ni Michael Koncz, ang Canadian adviser ni Pacquiao na sagupain si ‘Pacman’.