Letran at San Beda kakapit sa liderato
MANILA, Philippines – Muling mag-aagawan sa liderato ang Letran College at ang five-peat champions na San Beda College sa pagharap sa magkahiwalay nilang kalaban.
Kapwa nagdadala ng 10-2 record, lalabanan ng Knights ang St. Benilde Blazers ngayong alas-2 ng hapon, habang makakatapat ng Red Lions ang Perpetual Altas sa alas-4 sa second round ng 91st NCAA men’s basketball tournament sa The Arena sa San Juan City.
Ang kanilang ‘Big Three’ na sina guard Mark Cruz, Rey Nambatac at pro-bound Kevin Racal ang muling sasandigan ng Letran sa pagharap sa St. Benilde na sisilip ng tsansa sa Final Four.
Pipilitin naman ng San Beda na maduplika ang kanilang 83-75 panalo sa Jose Rizal University sa kanilang huling laro kung saan nagposte si pro-bound Arthur dela Cruz ng triple-double sa tinapos na 26 points, 15 rebounds at 10 assists.
Sa naturang laro ay muling nagbalik sa line-up si veteran guard Baser Amer, nagkaroon ng dislocated shoulder injury bago ang torneo.
“He has demeanor, leadership and winning attitude, you can’t coach that,” sabi ni Red Lions’ coach Jamike Jarin kay Amer na naglista ng 5 assists at 4 rebounds.
Sa panig ng Perpetual, inaasahang muling magla-laro si 6-foot-8 Nigerian import Bright Akhuetie, nakalasap ng minor shoulder injury sa kanilang 70-42 pagdurog sa Lyceum noong Setyembre 1.
Nakalasap ang Altas ng 77-84 overtime loss sa 2014 runner-up na Arellano Chiefs nang hindi maglaro si Akhuetie. (RC)
- Latest
