Hiyasmin (280)
MARAMING resource persons sa advertising congress pero ang babaing nagsalita ang labis na nakapukaw sa pansin ni Hiyasmin. Napakahusay magsalita ng babae na para bang humihigop sa sinumang nakikinig. Sa dami na rin ng mga nadaluhang ad congress ni Hiyasmin, ngayon lang siya labis na humanga sa speaker.
Habang nagsasalita ang babae ay hindi inaalis ni Hiyasmin ang tingin. Bukod sa napakahusay magsalita ay napakaganda. May lahing Arab ang babae ayon sa feature ng mukha. Hugis puso ang mukha, matangos na ilong, katamtamang lago ng kilay at halata na maganda ang pangangatawan kahit na nakaupo.
Mabilis na hinanap ni Hiyasmin ang pangalan ng babae sa makapal na programa na ipinamahagi sa kanila.
Sa dami ng speakers, hindi agad niya makita ang pangalan ng babae. Kailangan pa niyang isa-isahin ang programa.
Hanggang makita niya. Mary Underwood ang pangalan ng babae. May-ari pala ito nang malaking ad agency at kasalukuyang professor sa Harvard University. May masteral at doctoral degrees. Nakapagsasalita nang maraming wika.
At ang labis na ikinahanga ni Hiyasmin, fluent ito sa pagsasalita ng Filipino or Tagalog. Ang asawa nito ay isang American—si Douglas Underwood na isa ring advertising executive. Mayroong dalawang anak.
Lalong na-magnet si Hiyasmin kay Mary Underwood nang malaman na marunong itong magsalita ng Filipino.
Nang matapos magsalita si Mary Underwood para sa araw na iyon, sinikap ni Hiyasmin na makalapit sa babae. Nagmamadali siya sa pagbaba sa kinaroroonang upuan para mahabol si Mary.
Pero hindi niya malapitan dahil na rin sa dami ng tao at sa mga nagpapa-autograph dito. Mukhang sikat na sikat si Mary at maraming umiidolo sa larangan ng advertising at siguro’y dahil na rin sa husay sa public speaking.
Muling ni-review ni Hiyasmin ang programa. Nabasa niya na tatlong araw na speaker si Mary. Nakahinga nang maluwag si Hiyasmin. May pagkakataon pa siyang makilala si Mary.
KINAGABIHAN, nag-video call si Hiyasmin kay Dax. Iyon ang sinabi ni Dax sa kanya bago umalis patungong U.S.—mag-video call sa kinagabihan para nalalaman nito ang lagay niya.
Hindi malaman ni Hiyasmin kung ano ang uunahing ikuwento sa asawa.
“Ano ang pinakamagandang nangyari sa iyo diyan ngayong araw na ito, Love?” tanong ni Dax.
“May babaing speaker sa ad congress na napakahusay magsalita, Love.”
“Natural yun Love. Lahat nang speaker ay mahusay dahil linya nila.”
“Oo nga pero kakaiba si Mary Underwood, Love. Marunong siyang mag-Tagalog!”
“Ha?”
(Itutuloy)
- Latest
