Dioscora (105)
“HINDI pa makakabalik si Mam, Maria. Hindi raw niya alam. Ang mga pangangailangan daw natin ay ipadadala niya sa banko sa account ko at dun ko na lang iwi-withdraw. Marami pa raw siyang inaasikaso kaya hindi niya alam kung kailan iyon matatapos. Pero huwag daw tayong mag-worry dahil kapag natapos ang lahat nang inaasikaso niya ay babalik siya. Sa ngayon daw, malabo pa kung kailan matatapos. Hintayin na lang daw natin ang mga susunod niyang text. Huwag din daw siyang tatawagan.
“Yan ang mga sinabi niya sa text, Maria,” pagtatapos ni JC at ipinatong ang cell phone sa center table.
“Sa himig ng pananalita niya ay matatagalan pa siya bago makabalik. Wala siyang maipangakong date,’’ sabi pa ni JC at napabuntunghininga.
“Mukhang mabigat ang problema niya ano Kuya?’’
Tumango si JC.
“Hindi kaya next year na siya makapagpakita sa atin, Kuya?’’
“Posible ‘yun.’’
“Baka naka-graduate ka na sa course mo e hindi pa siya bumabalik.’’
Hindi nakapagsalita si JC. Baka magkatotoo ang sinabi ni Maria. Baka magtapos siya na wala si Mam.
“Sana naman narito na siya sa graduation ko. Sa kanya ko ireregalo ang bunga ng pinag-aralan ko.
ILANG buwan bago ang nakatakdang graduation nina JC, nalaman na niya ang magandang balita: kasama siya sa honor roll!
Nabalitaan iyon ni Angel at ito ang kauna-unahang bumati sa kanya.
“Congrats JC! Sabi ko na nga ba at kasama ka sa mga may honor! Galing!’’
“Salamat, Angel.’’
“Ano kayang masasabi ni Prof. Terror ngayon?’’
Napangiti lang si JC.
Itutuloy
- Latest