Kaibigan (105)
‘‘ANONG tinitingnan mo sa labas, Dex?’’ tanong ni Tess nang makita si Dex na nakatingin sa labas ng gate.
‘‘Parang may taong lihim na nagmamasid sa atin.’’
‘‘Anong nagmamasid?’’
‘‘Nakatingin sa direksiyon natin. Parang inoobserbahan tayo.’’
‘‘Saan mo nakita?’’
‘‘Walang eksaktong lugar kung saan basta ang pagkatingin ko ay inoobserbahan tayo.’’
‘‘Lalaki o babae?’’
‘‘Hindi ko matiyak.’’
‘‘Baka bakla?’’
‘‘Puro ka biro.’’
‘‘E kasi naman hindi mo tiyak kung ano ang nakita mo.’’
‘‘Basta nakatingin siya sa atin. Hindi ko mailarawan ang kanyang mukha.’’
‘‘Baka naman magnanakaw o akyat bahay?’’
Nag-isip si Dex sa sinabi ni Tess. May ilang kaso na ng pagnanakaw sa kanilang lugar. Pero hindi siya kumbinsido.
‘‘Hindi naman siguro, Tess.’’
‘‘Baka naman si Lara?’’
Nag-isip si Dex. At saka sumagot. ‘‘Kung si Lara bakit kailangan pa niyang magmatyag?’’
‘‘Siyempre nahihiya sa iyo. At saka siguro nakita ako na nakayakap sa iyo. Nag-aalangang kumatok.’’
Nag-isip uli si Dex. Posible ang mga sinabi ni Tess. Baka nga nahihiya si Lara na magtungo rito dahil nakitang may kasama na siyang babae. E ano naman ang ikahihiya niya kung may kasama siyang babae.
Nasa ganun siyang pag-iisip nang yayain na siya ni Tess sa loob.
‘‘Halika na sa loob,’’ sabi ni Tess at inakbayan siya. Nasamyo niya ang mabangong katawan ni Tess.
(Itutuloy)
- Latest