Huling Eba sa Paraiso (143)
“Saan daw naroon si Mr. C, Kuya?’’ tanong ni Tikoy.
“Nasa Binondo raw, sabi ni Luke. Sinabi raw sa kanya ng waiter na naging kaibigan namin.’’
“Kung ganun, dapat magtungo na rito si Sir Luke ano Kuya? Narito na pala ang kalaban. Hindi na siya mahihirapan. At saka narito ang mga tauhan niya.’’
“Palagay ko darating na siya. Nabanggit niya na nakakuha na siya ng warrant para maaresto si Mr. C.’’
“Delikado ang pagsisilbi ng warrant Kuya di ba? Maaaring lumaban si Mr. C. Palagay ko lahat nang kanyang tauhan sa probinsiya ay hinakot dito.’’
‘‘Tiyak ‘yun!’’
“Bakit kaya ganun na lamang kasidhi ang pagnanais ni Luke na maaresto ang Chinese drug lord, Kuya? Noon ko pa sana ito itatanong sa’yo pero hindi ko na magawa.’’
‘‘Nagtataka rin ako Tikoy. Palagay ko, may malaking dahilan si Luke kaya napakasidhi ng pagnanais niyang mahuli si Mr. C.’’
“Kasi kung basta lang pagtupad sa tungkulin bilang pulis, hindi siguro ganun katindi ang pagnanais niya di ba Kuya? Ano kaya ang nasa likod ng misyon ni Luke.’’
Kinagabihan, dakong alas dose ng hatinggabi, nakatanggap ng tawag si Drew kay Luke.
“Narito ako sa labas ng bahay mo Drew?’’
Gulat na gulat si Drew. Paano nalaman ni Luke ang bahay niya ganung hindi naman niya sinasabi rito.
“Sige Luke lalabas na ako. Sandali lang.’’
Nang lumabas siya, nakita niya si Luke na may dalawang kasama. Pinagbantay ni Luke ang dalawa sa labas.
Pumasok sila sa bahay.
“Nagulat ako Luke. Paano mo nalaman itong bahay ko.’’
‘‘Dahil sa mga pulis ko. Pinaguwardiyahan ko na kayo sa mga pulis ko nung isang gabi pa. Nakatanggap kasi ako ng report na kukunin ng mga bataan ni Mr. C si Marianne at papatayin. Talagang si Marianne ang gusto niyang makuha. Hindi nila magawa dahil may nakabantay na diyan sa labas.’’
“Ganun ba?’’
“Bukas ng madaling araw, nakakasa na ang pagsalakay namin sa pugad ni Mr. C. Isisilbi namin ang warrant.’’
“Sana magwakas na ang kasamaan ng taong ‘yun.’’
(Itutuloy)
- Latest