Huling Eba sa Paraiso (20)
Buo na ang pasya ni Drew na sundan ang babae at alamin kung saan ito nakatira. Hindi magkakaroon ng kaganapan ang mga ginagawa niya kung hindi malalaman ang tirahan ng babae. Alam niyang mali ang kanyang ginagawang panonood sa babae at pagkuha ng video at ngayon ay pagsubaybay dito pero kailangang matapos na ang mga katanungan niya ukol sa babae. Kailangang mayroon na siyang malaman sa babae. Hindi siya matatahimik kapag wala pang nangyari ngayon.
Mabilis na tumawid sa sapa si Drew. Hanggang baywang ang tubig. Inilagay niya sa bulsa ng kanyang jacket ang cell phone para hindi mabasa. Napakalamig ng tubig. Ngayon lang niya nalaman na sobra palang lamig ng tubi sa sapa. Kaya siguro bantulot ang babae kanina at pinag-isipan muna bago tuluyang maligo.
Nang makatawid sa sapa, mabilis na sumampa sa pampang si Drew. Kailangang masundan agad niya ang babae at baka mawala sa paningin niya. Alam niyang mabilis maglakad ang babae. Sanay na sanay maglakad sa damuhan ang babae.
Natanaw niya ang babae. May kalayuan na ang agwat sa kanya. Mabilis talagang maglakad kahit pa may bitbit na talbos ng pako.
Binilisan ni Drew ang paglalakad. Pero nag-iingat siya na baka makahalata ang babae na sinusundan niya. Hindi dapat masira ang plano niya.
Nagpatuloy sa paglalakad ang babae. Nakita ni Drew na pumasok ito sa kakahuyan. Hindi bumibitaw ang paningin ni Drew sa babae. Kapag nawala ito sa paningin niya, baka hindi na niya makita at balik na naman siya sa simula. Mas mahirap maghanap lalo at sa ganitong kakahuyan. Parang dinadaya siya ng paningin.
Pero ginantimpalaan siya sa matiyagang pagsubaybay.
Nasundan niya ang babae at nakita niyang huminto ito sa tapat ng bahay. Bahay na kaya ng babae?
(Itutuloy)
- Latest
