Monay (194)
Hindi inaasahan ni Joem ang mga sinabi ni Monay. Matagal na raw siyang hinihintay nito pero wala siyang ginagawa. Ang ibig sabihin, mahal siya ni Monay?
Magsasalita na sana siya pero mayroon pang sinabi si Monay na lalong nagkukumpirma na mahal siya nito. Parang musika sa taynga ang mga sinabi ni Monay.
‘‘Hinihintay kong sabihin mo sa akin na ‘mahal kita Monay’ o kaya’y ‘iniibig kita Monay’ pero wala kang ginagawa. Siguro ay nahihiya ka. Pero sana tinapangan mo. Puwedeng-puwede mo namang sabihin nung nag-iisa tayo habang nakaupo sa bench ng school. Pero wala kang sinabi. Kaya nagkahiwalay tayo na wala kang nasabi kahit ano. Kaya naisip ko, siguro ay wala kang nararamdaman sa akin. Ako lang ang may nararamdaman. Ako lang ang may pagtatangi…kakahiya ano. Ako pang babae ang naglahad ng ganito. Sabagay bakit ba ako mahihiya? Hindi na uso ang hiya-hiya ngayon…’’ Tumigil sa pagsasalita si Monay, tumitig kay Joem.
At saka nagtanong.
“Ano masasabi mo Jose Emmanuel? O nahihiya ka pa rin hanggang ngayon? Sabihin mo na bago ako umalis pa-US. Huwag ka nang mahiya dahil matanda na tayo.’’
‘‘Mahal din kita Monay.’’
(Itutuloy)
- Latest