Ang Babae sa Silong (55)
HINDI gusto ni Dado ang ipinakita sa kanya ng lalaking nagbukas ng pinto kanina. Parang duda o diskumpiyado ito sa kanya. Parang sinisiyasat siya kanina. Nagtataka marahil kung bakit hinahanap at tinatanong niya si Gab. At lalong naging mapanuri ito nang sabihin niyang mayroon lang siyang sasabihin kaya hinahanap si Gab.
Nang magpaalam siya at tumalikod, walang anumang isinalya ang pinto para sumara.
Kaya nga nagsisisi siya kung bakit kumatok pa. Aywan ba niya kung bakit biglang naisip niya na kumatok. Gusto lang kasi niyang malaman kung nasa inuupahang kuwarto si Gab. Akalain ba niyang ang lalaki pala ang naroon.
Pero nasaan kaya si Gab?
Nagtatago kaya?
Bakit?
NANG umuwi siya kinagabihan, sabik siyang sumilip sa butas para malaman kung naroon na sa silid nito si Gab.
Hindi na siya nagpalit ng damit at agad inalis ang nakapasak na papel sa butas.
Dumapa at sumilip sa butas. Dumalas ang kaba niya.
Sumilip siya.
Nagulat siya sapagkat ang nakita sa room ni Gab ay ang lalaking nakausap niya kaninang umaga. Nakahiga ang lalaki sa kama ni Gab at tila may pinanonood sa CP nito. Abalang-abala sa pagpindot sa CP ang lalaki.
Pilit na sinisilip ni Dado kung may katabi ang lalaki sa kama. Wala!
Patuloy ang lalaki sa pagpindot sa CP. Naglalaro yata ng game at hindi nagti-text.
Nag-obserba pa si Dado.
Wala talaga si Gab.
Maya-maya, umalis ang lalaki sa kama. Nawala ito sa paningin niya. Lumabas.
Naghintay si Dado.
Hindi na bumalik ang lalaki. Maya-maya pa pinatay na ang ilaw sa kuwarto.
Tumayo si Dado mula sa pagkakadapa.
Nasaan kaya si Gab? Hindi kaya umuwi ito ng probinsiya?
Posibleng umuwi ito.
Saka binalikan niya kung anong petsa ito huling umuwi sa probinsiya.
Isang buwan na ang nakalilipas. Nasa probinsiya nga siguro.
(Itutuloy)
- Latest