Alupihan (69)
ALAM ni Cris na ang bagong boarder na si Hani ang tinutukoy nina Gretchen at Diana. Kahit na hindi nagsabi ng pangalan ang mga ito, malinaw na si Hani ang tinutukoy dahil ito lang naman ang bagong boarder.
Nahiling ni Cris na sana ay huwag lumabas ng room niya si Hani para hindi na marinig ang mga sinasabi ng dalawa.
“Hindi ka na nakapagsalita, Kuya,” sabi ni Gretchen. ‘‘Sabi mo, pawang magaganda ang kukunin mong boarder e bakit may nasingit na hugis inidoro.’’
Naghagikgikan ang dalawa pagkatapos.
“Huwag naman kayong ganyan, Girls. Baka marinig kayo e sabihin e pinagkakaisahan n’yo siya. Please lang…’’
“Ikaw naman Kuya para napansin lang namin si Hani eh natakot ka na agad,’’ sabi ni Diana.
Lalong kinabahan si Cris dahil binanggit ni Diana ang pangalan ni Hani.
“Huwag mo nang banggitin ang name niya, please.’’
Lalong naghagikhikan ang dalawang pilya.
“Kuya, nalimutan naming itanong kung ano ang surname ni Hani,’’ sabi ni Gretchen.
Luminga-linga muna si Cris bago sumagot.
“Lupa ang apelyido niya.’’
“Lupa?’’ sabay na sabi nina Gretchen at Diana.
“Oo.’’
“Kakaibang apelyido. Bagay sa mukha, ha-ha-ha!’’ sabi ni Diana. At nakitawa si Gretch.
‘‘Please huwag kayong maingay.’’
Natahimik ang dalawa.
“Sige Kuya, ituloy mo na ang ginagawa mo. Halika na, Diana.’’
Umalis na ang dalawa.
Makalipas ang may sampung minuto, nagdaan si Hani. Naka-office uniform. Papasok na siya.
“Good morning Kuya,” bati nito.
“Good morning, Hani. Papasok ka na?’’
“Oo Kuya.’’
“Sige ingat.’’
“Salamat, Kuya.’’
Sinundan ni Cris ng tingin si Hani. Seksi talaga ito kahit nakatalikod. Huwag lang haharap.
(Itutuloy)
- Latest