Alupihan (49)
Naisip ni Cris na problema rin pala ang pagpapaupa ng kuwarto sa mga babae. Hindi dahil sa mga pasaway ang babaing boarders niya kundi inaakit siya na gumawa ng isang bagay na ayaw naman niyang gawin. Mayroon siyang pangako sa nasirang asawa at hindi niya babaliin ang pangako kahit nga sinabi nito noon na puwede naman siyang mag-asawa basta ang pipiliin ay ‘yung tulad niya ang ugali.
Kung sa ibang lalaki ay hindi iyon problema at maari pang ipagmalaki dahil senyales ng kamachohan, para sa kanya iyon ay isang kasalanan at pagsira sa pangako.
Naisip din naman ni Cris na kung pawang lalaki naman ang kinuha niyang boarders, baka lalong problem. Baka bangayin siya kapag may problema sa kuwarto o anumang bagay dito sa bahay.
Sabi naman ng kanyang kapatid na si Berna, okey lang na mga tsik ang pinaupa niya para walang gulo. Mas less ang gulo kapag mga babae ang boarders.
Pero ngayon, parang hindi tama ang sinabi ng kanyang sister dahil nagdudulot sa kanya ng isipin ang mga ‘‘pagpaparamdam’’ ng kanyang magagandang boarders.
Napahinga nang malalim si Cris.
Problema nga ba ito?
ISANG umaga, dakong alas nuwebe, ginawa ni Cris ang kanyang routine Maglalampaso sa corridor ng mga kuwarto sa itaas. Tiyak namang nasa trabaho at school ang kanyang boarders.
Sinimulan niya ang paglampaso.
Pero nagtaka siya nang makita si Gretchen na pumasok sa room ni Diana! Ba’t narito pa si Gretchen? Dapat nasa trabaho na ito.
(Itutuloy)
- Latest
