Ahas sa Garden (421)
Makalipas ang isang linggo na pamamalagi sa Maynila, nagbalik sa probinsiya sina Alexis at Nicole.
At nang mga sumunod na araw, ipinamalita na nila sa mga kasamahan at manggagawa sa vegetable farm ang balak na pagpapakasal.
Marami ang natuwa sa kanilang balak. Noon pa, marami nang nakaaalam na magkasintahan sila. Nasisiyahan sila sapagkat bagay na bagay ang dalawa. Isa pa, gusto na rin nilang may katuwang si Alexis sa buhay. Kung may katuwang ito, tiyak na lalong mapapagbuti ang pamamahala at pagpapatakbo sa farm.
Isa sa mga natuwa ang kaibigan ni Nicole na si Nina.
“Congrats, Nicole. Sabi ko na nga ba at maganda ang kahahantungan ng pag-iibigan n’yo. Kailan ba gagawin ang kasalan?’’
“Pagkatapos ng graduation ko, Nina. Isa ka sa bridesmaid ha.’’
“Ay excited ako. Mas excited pa yata ako kaysa sa bride, ha-ha-ha!’’
“Simple lang ang kasalan. Sa simbahan sa bayan gagawin ang seremonyas at dito sa farm ang reception para makadalo lahat ang mga tao. Sabi ko kay Alexis, gusto ko e makadalo lahat ang mga kasamahan natin.’’
“Tama ‘yun, Nicole. Pero bakit napabilis yata.’’
“‘Yun ang gusto ni Alexis. Ayaw na raw niya akong mapalayo pa sa kanya. Nagkaroon daw siya ng takot dahil sa nangyari sa akin noong nakaraang buwan.’’
“A kaya pala. Sabagay tama si Alexis. Dapat nga lagi na kayong magkasama sa lahat nang oras.’’
“Ako man, Nina, gusto ko laging kasama si Alexis. Natatakot akong mag-isa.’’
“E ‘di dapat sa bahay ka na ni Alexis tumira.’’
“Lagi siya sa bahay. Ginuguwardiyahan ako.’’
Napangiti si Nina.
Madalas na namamasyal sina Alexis at Nicole sa farm. Tuwing umaga, habang sumisikat ang araw, magkahawak-kamay silang namamasyal sa taniman ng gulay.
Nagpaplano para sa kinabukasan. Punumpuno sila ng mga pangarap.
(Itutuloy)
- Latest
