Ahas sa Garden (407)
Nakaramdam ng panganib si Nicole. Masama na ang kutob niya. May gagawin ang traysikel drayber at ang lalaking katabi niya.
Nagsisigaw siya para may makarinig at nang mapigilan ang masamang gagawin ng dalawa.
“Ibaba n’yo ako! Ibaba n’yo ako!’’
Siniksik siya ng katabing lalaki.
Pero lalong nagsisigaw si Nicole.
“Saklolo! Tulungan n’yo akoooo!’’
Sinigawan siya ng traysikel drayber.
“Tumigil ka riyan!’’
“Ibaba n’yo akoooo!’’
Pero walang narinig ang drayber at lalo pang pinaharurot ang traysikel. Sobrang bilis ng takbo.
Napansin ni Nicole na nakangisi ang katabing lalaki. Parang sabog ito sa illegal na droga. Tila nagti-trip ito habang tumatakbo ang traysikel.
Hanggang sa mapansin ni Nicole na iba na ang kanilang tinutungo. Sa halip na kumanan patungo sa Bgy. Encarnacion, kumaliwa ito at saka pumasok sa isang makipot na kalsada na pawang mataas ang damo.
‘‘Saan n’yo ako dadalhin? Ibaba n’yo ako! Ibaba n’yo akooooo!’’
“Huwag kang maingay. Dadalhin ka namin sa langit. Paliligayahin ka namin, he-he-he!’’
Gumapang ang kilabot kay Nicole. Masama ang mangyayari sa kanya.
Nagpatuloy sa pagtakbo ang traysikel.
Pumasok sa kakahuyan. Lalo nang naging madilim. Hindi na niya alam kung saan ang lugar. Malayo na.
“Puwede na ba rito, Kikoy?’’ Tanong ng drayber.
“Puwede na!’’
“Ibaba mo na ‘yan!’’
Hinaltak si Nicole ng lalaki na ang pangalan ay Kikoy.
“Halika na!”
(Itutuloy)
- Latest