Ahas sa Garden (343)
ILANG buwan ang nakaraan, abala si Alexis sa kanyang opisina sa Maynila para sa mga bagong ka-transaction na restaurant at hotel nang may isang lalaking dumating. Nasa 25-anyos marahil ang lalaki. Mukhang mabait.
“Sir, ikaw po ba si Alexis?’’
“Oo. Ano ang sadya mo sa akin?’’
“Kapatid po ako ni Brenda. Ate ko po siya.”
Pinagmasdan ni Alexis ang lalaki. Kahawig nga ni Brenda.
“Matagal ko na po kayong hinahanap mula nang mapatay si Ate. Ang agent po ng PDEA na si Sgt. Diaz ang nagsabi sa akin ukol sa’yo. Hinanap ko rin ang bangkay ng ate ko, pero sabi ng punerarya ikaw po ang tumubos. Gusto ko pong magpasalamat sa iyo, Sir Alexis at pinalibing mo ang ate ko.’’
Hindi makapagsalita si Alexis. Mukhang nagsasabi ng totoo ang lalaki.
“Anong name mo?’’
“Franco po.’’
“Saan ka nakatira?’’
“Sa Tatalon po.’’
Napatangu-tango si Alexis.
“Gusto ko pong malaman kung saan nakalibing si Ate. Parang awa mo na po Sir Alexis.’’
“Sige, pupuntahan natin ang kinalilibingan niya.’’
“Marami pong salamat, Sir Alexis. Kahit man lang libingan niya, makita ko.’’
(Itutuloy)
- Latest