Ahas sa garden (199)
“MAGKO-CONCENTRATE na lang ako sa gulayan at iba pa naming tanim ni Tatay sa probinsiya Manang. Malaki ang naitutulong sa aming kabuhayan ng vegetable farming,” sabi ni Alexis.
“Oo nga. Yun na lang ang asikasuhin mo. Tahimik na ang buhay sa probinsiya, sariwa pang gulay ang makakain.’’
“Tama ka Manang. Ikaw Manang, ano ang pasya mo ngayon?”
“Uuwi na rin ako sa probinsiya namin. Maski nanghihinayang ako at nawalan nang silbi ang paglilingkod ko sa pamilya ni Sir Nath, tinatanggap ko na. Siguro ito talaga ang palad ko. Dahil sa walanghiyang si Brenda, nagkasira-sira ang plano ko sa buhay.’’
“Hindi ka kaya hanapin ni Brenda, Manang?’’
“Posible yun, Alexis. Kasi alam ko ang sekreto niya. Marami akong nalalaman sa kanya. Pero kung susundan niya ako sa probinsiya, iyon ang malaki niyang pagkakamali. Doon ko siya ililibing nang buhay. Kapag napunta siya sa balwarte ko, hindi na siya makakaalis nang buhay dun!’’
“Pero mag-ingat ka rin Manang.’’
“Oo Alexis. Yun naman ay mangyayari kung pagtatangkaan niya akong patayin. Pero kung hindi, walang mangyayari sa kanya.’’
“Kukunin ko ang bagong CP number mo Manang at magtawagan na lang tayo.’’
“Oo. Eto ang number ko.’’
Nang maibigay ang number, nagpaalam na si Alexis.
Naghanda naman si Manang sa pag-uwi niya sa kanilang probinsiya.
NAIBENTA na ang mansion ni Sir Nath. Nasubaybayan ng maid na si Ester ang mga nangyayari sa mansion. Ilang araw makaraang makita niya na umalis sina Sir Nath at Brenda, isang lalaking mukhang Chinese ang nakita niyang nag-iinspeksiyon sa paligid ng mansion.
Kumpirmadong nabili na nga ang mansion nang may mga sasakyang pumasok sa loob. Pawang closed van. Mukhang negosyante ang mga Chinese na nakita niya.
Bakit kaya pawang mga closed van ang nasa loob? Sa tantiya ni Ester, mga 10 van ang nasa loob.
Sumunod na araw may malaking container van na pumasok sa malaking bakuran.
Labis ang pagtataka ni Ester.
(Itutuloy)
- Latest