Ahas sa Garden (132)
NAGULAT si Alexis nang biglang lumapit sa kanya si Sir Nath.
‘‘Alexis, magpahinga ka naman! Kanina ka pa may ginagawa riyan ah. Magmeryenda ka muna.’’
Ngumiti lang si Alexis pero sa sarili niya ay naroon ang pagkainis sapagkat pakitang tao lamang iyon. Kunwari ay mabait pero ang totoo, balak na siyang sibakin dito ayon kay Brenda. Sa panlabas ay maamong tupa pero ang kalooban ay mabangis na tigre. Humanda ka sa pagganti ko! Mas matindi pa ang igaganti ko!
‘‘Para kang lalong naging mahiyain, Alexis. Hindi ka naman ganyan dati. Mabuti siguro ay magbakasyon ka muna sa inyong probinsiya. Di ba nasa probinsiya na ang mga magulang mo at kapatid. Dalawin mo muna.’’
Hindi agad nakasagot si Alexis sa alok ni Sir Nath. Ngayon lang ito nag-alok ng ganun. Hindi kaya bahagi iyon ng pagsibak sa kanya? Kunwari ay pagbabakasyunin siya pero ang totoo, sisibakin na siya. Pagbalik niya ay wala na siyang trabaho. Hindi! Hindi siya magbabakasyon. Kahit matagal na siyang hindi nakakauwi sa probinsiya, hindi siya kakagat sa bitag ni Sir Nath.
“Saka na lang Sir Nath. Hindi muna ako magbabakasyon.”
“Bakit? Bibigyan kita ng pamasahe.’’
“Wala pong mag-aasikaso ng pool. Baka maging marumi dahil sa laglag na mga dahon. Isa pa baka may ahas na namang makapasok dito.’’
Tinitigan siya ni Sir Nath. Matagal. Tila sinusuri siya at tinitimbang ang mga sinabi niya.
(Itutuloy)
- Latest
