Ahas sa Garden(45)
MATATAPOS nang sagapin ni Alexis ang mga dahon na nalaglag sa swimming pool nang biglang dumating si Manang. Hula ni Alexis, sasagap ng tsismis si Manang. Wala naman itong makukunan ng inpormasyon kundi siya. Kahit na alam niyang naiinis sa kanya si Manang dahil kay Brenda na kinakampihan daw niya, hindi rin ito makatiis na hindi siya lapitan.
“Dumami ang trabaho mo, Alexis!’’
“Okey lang po, Manang.’’
“Bakit mo nililinisan ‘yan?’’
“Maliligo sina Sir Nath at Brenda mamaya. Kailangan, malinis na malinis na ito bago sila magising.’’
“Dahil sa swimming pool na ‘yan kaya ang mga orchids ni Mam ay kung saan-saan na lang nailagay. Kawawa naman ang orchids! At alam ko, ang malanding si Brenda ang may kagagawan kaya nabalewala ang orchids. Inuto niya si Sir Nath na magtayo ng swimming pool. Di ba tama ako, Alexis?’’
Hindi sumagot si Alexis. Hahayaan na lang niyang magsalita si Manang.
“Hindi ako maaaring magkamali, si Brenda ang dahilan kaya naitayo ang pool na ito.’’
Patuloy lang sa pagsagap ng iba pang dumi si Alexis.
“Bakit ayaw mong magsalita, Alexis?’’
Hindi nakatiis si Alexis.
“Ano naman ang sasabihin ko, Manang?’’
“Kasi’y parang okey lang sa’yo ang lahat.’’
“Wala kasi akong magagawa, sila ang may-ari.’’
“Gusto mo rin kasi na may swimming pool para lagi mong nakikita ang paliligo ng malandi!’’
(Itutuloy)
- Latest