Sadiq (154)
“NAMATAY si Itay habang nasa Saudi ako. Hindi ko man lang siya nayakap. Sana ay nakauwi agad ako noong siya ay nagkasakit. Pero hindi ko nagawa iyon dahil ang akala ko, gagaling na siya. Kung alam ko lang na mamamatay na siya sana ay umuwi agad ako. Sising-sisi ako!’’ pagkukuwento ni JayR kay Bela.
Nabagbag ang kalooban ni Bela sa kinuwento ni JayR. Sa tingin niya, sinisisi ni JayR ang sarili dahil hindi agad nakauwi mula Saudi.
“Pero ginawa mo naman ang lahat di ba JayR. Hindi ka rin naman nagkulang. Hindi mo dapat sisihin ang sarili.’’
“Nakokonsensiya kasi ako na hindi agad nakagawa ng paraan gayung pupuwede naman.’’
“Para sa akin, hindi mo dapat sisihin ang sarili. Walang may kasalanan kaya nangyari iyon.’’
Napahinga nang malalim si JayR.
“Ang Inay mo, kumusta naman siya ngayon?’’
“Mabuti naman. Inaalagaan kong mabuti sapagkat ayaw ko nang matulad kay Itay. Awa naman ng Diyos ay malakas ang pangangatawan niya. Siya ang kasama ko ngayon sa bahay. Ayaw niya sa kapatid kong babae. Mas gusto raw niya akong kasama at napapanatag ang loob niya.’’
“Anong age na niya ngayon?’’
“Mahigit 80 na siya.’’
“Tatagal pa ang buhay niya dahil inaalagaan mong mabuti.’’
“Sana nga para naman makita niya ang magiging manugang niya.’’
Napangiti si Bela.
(Itutuloy)
- Latest
