Sadiq(119)
MAG-AALAS TRES na ng hapon nang maghiwalay sina Sadiq at dating kasamahan sa trabaho na si Rene. Pareho sila ni Rene na dating kabilang sa third sex noon na nagtagumpay makatakas at nakabuo nang maganda at maayos na pamilya.
Sabi nga ni Rene nang maghiwalay sila, “Hindi ko maipagpapalit ang kalagayan ko ngayon na may nagmamahal na asawa at mga anak. Kuntentong-kuntento na ako, Sadiq. Walang makapapantay sa nararamdaman kong kaligayahan ngayon.’’
“Pareho tayo nang nararamdaman, Rene. Wala na akong mahihiling pa sapagkat mayroon akong magandang pamilya na hindi ko maipagpapalit. Katulad mo, kuntentung-kuntento rin ako.’’
Nagyakap at nagkamay silang mahigpit bago naghiwalay.
“Magtawagan tayo Sadiq, eto ang number ko. Masarap magkuwentuhan.’’
“Sige, Rene. Maraming salamat at nagkita tayo.’’
Naghiwalay na sila.
Nagtaka naman si Gina kung bakit hapon nang dumating si Sadiq.
“Ba’t natagalan ka Daddy?’’
“Sorry, hindi na kita nai-text. Nagkita kami sa Ayala ng dati kong officemate at nagkuwentuhan. Ang pangalan niya ay Rene.’’
“Akala ko, kung ano nang nangyari sa’yo. Kasi’y maaga ka laging dumarating. Alam mo naman ako, lagi kitang nami-miss. Minuto ka lang na mawala sa akin, hinahanap na agad kita.’’
“Ay ang sweet naman! Pa-kiss nga, ummm!’’ Pagkatapos ay niyakap ni Sadiq ang asawa.
“I love you, Mommy!’’
Nawala ang kaunting tampo ni Gina.
Ikinuwento naman ni Sadiq na si Rene ay dati ring bakla. Marami silang napagkuwentuhan na ang karamihan ay ang pagtatagumpay nilang makatakas sa dating daigdig nilang ginagalawan.
(Itutuloy)
- Latest