Sadiq (55)
“AYAW akong tigilan ng baklang si Jeremy. Huwag daw akong maging plastic. Sundin ko raw kung ano ang sinisigaw ng puso ko. Sumama raw ako sa kanya sa Pink Eagle para mabuhay muli ang dugo ko. Masisiyahan daw ako sa mga nangyayari sa gay bar. Tinapik-tapik pa ng bakla ang harapan ko pero tinabig ko ang kamay niya. Gulat ang bakla.
“Sabi ko, tigilan na niya ako dahil kahit na anong panunukso at pagpapatakaw niya sa akin, wa epek na dahil nagbago na ako. Maligaya ako sa piling ng aking asawa at tatlong babaing anak. Wala na akong mahihiling pa. Lahat nang katangian ng isang babae, nasa asawa ko na at mahal na mahal ko siya. Wala nang hihigit pa sa kanya. Kaya mariin kong sinabi sa bakla, tigilan na niya ako. At kapag hindi niya ako tinigilan, babasagin ko ang mukha niya.’’
“Ano ang sabi ng bakla, Sadiq?’’
“Namutla siya. Kulot na kulot ang boses na nagso-sorry sa akin. Hindi na raw mauulit at saka biglang nagpaalam. Nagmamadaling umalis.’’
“Akala siguro e bakla ka pa Sadiq.’’
“Maaari nga.’’
“Mula nun hindi na kayo nagkita ng bakla?’’
“Hindi na. Natakot na siguro dahil ang sabi ko, babasagin ang mukha niya.’’
Napahagalpak ng tawa si JayR.
‘‘Ikinuwento ko nga kay Gina ang pangyayaring iyon at pakiramdam ko, lalo niya akong minahal. Niyakap ako at pinaghahalikan.’’
Napangiti si JayR. Humahanga siya kay Sadiq dahil sa ipinakita nitong determinasyon. Lalo pa niyang naging idolo ang kaibigan.
“Wala na siguro akong maikukuwento JayR. Halos lahat nasabi ko na sa’yo.’’
“Ganda ng story mo, Sadiq.’’
“Salamat, JayR.’’
(Itutuloy)
- Latest
