Sa Piling ng Kalapati (Wakas)
NARINIG ni Mommy Donna ang sinabi ni Keiko kay Ruth na bakit hindi pa ito magpakasal kay Joshua.
“Oo nga Ruth, bakit hindi pa kayo magpakasal ni Joshua. Nasa tamang edad na naman kayo.’’
“Pati ikaw Mommy, itinutulak mo na akong mag-asawa?’’
“Oo. Kasi sabik na akong magkaapo. Gusto kong makita kung gaano ka-cute ang aking apo sa’yo.’’
Nagtawa si Ruth sa sinabi ng ina-inahan.
“Ikaw talaga Mommy, ayaw mo na yata akong makita kaya pinag-aasawa mo na ako, ha-ha-ha!’’
“Aba hindi, gusto ko ngang makakita na ng apo. Sabik na ako.’’
“Talagang gusto mo nang magkaapo, Mommy?’’
“Oo. Sige na magpakasal na kayo ni Joshua.’’
Sumabad si Keiko.
“Sa Japan kayo mag-honeymoon at ako ang bahala sa tirahan n’yo! Magandang mag-honeymoon sa Tokyo o Osaka.’’
Kinilig si Ruth. Nag-imadyin.
“Sabagay pinag-usapan na namin ni Josh ang wedding pero wala pang final. Balak pa lang.’’
“I-finalize n’yo na, anak!” sabi ni Mommy Donna. “Gusto ko talagang makakita na ng apo.’’
“Okey sige. Pagbalik n’yo galing Japan, baka pinal na. Magugulat kayo!’’
“Yeheey!’’ sabi ni Keiko.
Niyakap ni Mommy Donna si Ruth.
ARAW nang pag-alis ni Mommy Donna at Keiko patungong Japan. Inihatid ni Ruth ang mga ito.
“Pagbalik namin ni Mommy, dapat final na ang wedding plan n’yo. Ang pangako ko para sa honeymoon n’yo, totoo yun.’’
“Oo Keiko, pagdating n’yo magugulat kayo.’’
“Sana nga anak, tuloy na ang kasal n’yo. Sige ingat ka. Babalik kami ni Keiko.’’
“Mag-ingat din kayong dalawa.’’
Niyakap nang mahigpit ni Ruth si Mommy Donna at pagkatapos ay si Keiko.
Pumasok na sa loob ng airport ang dalawa.
(BUKAS, ABANGAN ANG BAGONG NOBELA NI RONNIE M. HALOS. HUWAG KALILIGTAAN.)
- Latest
