Sa Piling ng Kalapati (6)
“GUSTO mo pa?” tanong ni Ruth kay Coco.
Umiling ito.
“Bakit ayaw mong magsalita?”
“Ayaw ko na. Busog na ako.’’
“Ganyan, magsasalita ka.’’
Tumungo si Coco.
“Ako nga pala si Ruth. Tawagin mo akong Ate Ruth.’’
Tumango lang si Coco.
“Alam mo bang nakita kita roon sa kanto na kinakaligkig sa ginaw? Iniuwi ka namin dito ni Mommy Donna. Awang-awa ako sa’yo. Bakit ka kinakaligkig sa ginaw?’’
“Gutom na gutom kasi ako at maginaw ang semento.’’
“Akala ko nga may dengue ka na. Pinunasan kita nang maligamgam na tubig alam mo ‘yun?’’
Umiling.
“Pagkatapos kitang punasan, biglang nawala ang panginginig mo. Parang nagdahilan ka.’’
“Dahil nga malamig ang semento at saka walang laman ang tiyan ko.’’
“Kaya nga ang sabi ko kay Mommy Donna, e dalhin ka sa ospital. Pero sabi ni Mommy huwag na raw dahil wala ka namang sakit.’’
“Giniginaw nga lang ako.’’
“Ano ka ba nawala o naglayas?’’
“Naglayas!’’
“Bakit ka naglayas?’’
Sa halip na sumagot, umiyak si Coco.
(Itutuloy)
- Latest
