BINI, milusad sa  “Signals” sa International music scene

CEBU, Philippines — Gipadayon sa P-pop girl group nga BINI ang ilang pagbaton sa international spotlight pinaagi sa pag-release  sa ilang bag-ong mini album nga “Signals,” nga nagtimaan sa ilang mas lapad nga tingog  ug presensya sa global music scene.

Ang  key track niini nga “Blush” kay  una nila nga ipasundayag nga live sa ilang paglugwa  sa Coachella karong  adlawa , Abril 11 (PHT), usa ka makasaysayanong higayon isip unang Filipino group nga maka-perform  sa maong music  festival. Ang “Signals” naglangkob sa mga bag-ong awit nga sama sa “Tic Tac Toe,” “Sugar Rush,” ug “Step Back,” lakip ang ilang nag-unang  singles nga “Unang Kilig” ug “Honey Honey.” Ang “Blush,” nga usa ka summer-crush anthem, naghulagway sa kilig, kakulba, ug kahinam  sa pagkakita sa espesyal nga tawo.

Pinaagi sa “Signals,” gipakita sa BINI ang lain-laing porma sa pagpakita sa gugma, gikan sa unang kilig hangtod sa kaisog sa pagpadayag  sa pagbati nga nagpalig-on sa ilang misyon nga ipadungog ang OPM sa tibuok kalibutan.

Madungog sa nagkalain-laing music streaming platforms ang mga unod sa maong mini album .