Magic, Bucks nakabawos; Wolves 2-1 na vs Lakers

CEBU, Philippines —  Nadasig sa mainit nga abiba sa ilang fans didto sa ilang korte, Orlando Magic ug ang Milwaukee Bucks miresbak sa tagsa-tagsa nila ka mga karibal aron putlon ang ilang alkansi ngadto sa 2-1 sa best-of-seven NBA Eastern Conference first-round playoff series kagahapong adlawa.

Ang Orlando Magic mipayaka sa defending champion Boston Celtics, 95-93, sa Game 3 samtang ang Bucks nakabawos sab sa Indiana Pacers, 117-101.   

Krusyal kaayo ang ilang kadaogan gumikan kay sa kasaysayan sa NBA, wala pay team nga nakadaog human malubong og 3-0 sa usa ka playoff series.

Si Franz Wagner mipabuto og 32 puntos ug walo ka assists samtang si Paolo Banchero mipupo og 29 puntos ug unom ka rebounds alang sa Magic.

Ang Celtics nakagukod human mabiyai og 12 puntos sa katapusang kuwarter apan ang Magic nakamaneho pag-eskapo ngadto sa kulbahinam nga daog.

Si Jayson Tatum mipatuasik og 36 puntos apan wala mosaler ang maanindot niyang salida sa Celtics.

Didto sa Milwaukee, sila si two-time MVP Giannis Antetokounmpo ug Gary Trent Jr. mipabuhagay og 37 puntos matag usa alang sa Bucks.

Si Trent milansang og siyam ka 3-pointers aron tablahon ang rekord sa Bucks alang sa labing daghan nga tres sa usa sa duwa sa playoffs nga gikulit ni Ray Allen.

Tungod sa pagpanginit ni Trent, ang Bucks nakabangon human maalkansi og 10 puntos sa halftime. Ilang gikastigo ang Pacers, 39-18, sa ikatulong kuwarter aron kontrolahon ang duwa diin sila miabante og 20 puntos sa usa ka higayon.

Si Pascal Siakam maoy nangu sa Pacers uban ang 28 puntos samtang si Tyrese Haliburton mihipos og 14 puntos ug 10 ka assists sa pilderong kawsa.

Didto sa West, si Jaden McDaniels mikadlit og playoff career-high 30 puntos sa dihang gipakaging sa Timberwolves ang Los Angeles Lakers, 116-104, aron pagposte og 2-1 nga bentaha sa ilang serye.

Si Anthony Edwards mitali og 29 puntos samtang si Julius Randle midugang og 22 puntos alang sda Wolves, nga milampaso sa Lakers, 13-1, sa pinal nga 4:37 sa duwa human si Luka Doncic mapasud sa iyang baseline jumper aron tablahon ang iskor, 103-103.

Si LeBron James miharos og 38 puntos apang nakawang ang iyang paningkamot alang sa Lakers.