Makig-check in sa laing babaye

Dear Tito Miguel,

Ako diay si Yesa, taga Barili, Cebu. Naproblema ko sa akong uyab nga si RJ kay wala gihapon mausab ang pagkamahiligon og laing babaye bisan naa na siya'y uyab. Kapila na nako nasakpan nga nag-char char og laing babaye. Gani dunay kausa nga nabiyaan ni RJ sa lamesa ang iyang laptop busa abtik ko nga ni-check sa iyang naka-online nga Facebook account. Nasakpan gyud nako ang conversation nila ni RJ ug sa usa ka babaye kun diin nagsabot sila nga mag-check in sa usa ka motel. Sa dihang akong gi-confront si RJ, niana siya nga joke ra daw tu, ug wala siya'y plano nga makigkita sa maong babaye. Ambot lang gyud Tito Miguel, marupok gyud ko og dali rako madala sa mga char-char nga words ni RJ. Love man gud nako siya busa  naglabad akong ulo sa pagsige og huna-huna kun unsaon nako pag-start aron hinay-hinay na nako siya nga ma-let go. Tambagi ko Tito Miguel, daghang salamat. -Yesa-

Yesa,

Dili sayon ang pag let go kun nahigugma pa ka. Tungod sa gugma ikaw buta ug bungol, imo gihapon dawaton ug pasayloon maski ang sala iyang balik-balikon. Kun nanghinaot ka nga siya mausab, wala ka’y mapaabot. Kay mao na iyang pagkatawo, sa usa dili makuntento. Dili makonsensiya, kay para niya ang pagbudhi, panlingla ug pamakak natural ra, busa wala siya’y angay usbon.

Kun sa tan-aw nimo nausab na, ikaw ra’y giilad. Igo ra na nitago’g maayo aron dili ka makamatikod. Busa piyonga imong mga mata, makita ba nimo imong kaugalingon kuyog niya hangtod nga matiguwang mong duha? Kun dili, angay na ka modesisyon karon. Ayaw padayon sa relasyon nga wala’y kaugmaon. Kun oo gihapon, ayaw na’g reklamo, ang sakit sa dughan gipili nimo.

Tinuod, sakit ang pagbiya sa hinigugma, apan mas sakit pa imong agian sa umaabot. Kun masakitan man ka, karon na, ayaw na dugaya pa. Salig lang nga ang panahon mao’y makapakalimot nimo, labi na gyud kun makakita ka’g lain nga kanimo tiunay ug sinsero.

Dawata nga wala ka niya higugmaa. Ka’y kun tinuod pa, dili unta siya makaako pasakitan ka. Puede tingali kausa mapasaylo pa, apan kun balik balik na, buot pasabot giduwa-duwaan ra ka. Angay sab ka mahadlok sa sakit nga posible makuha niya sa lain. Kun siya himabaye, makighilawas gyud na, bangaa gud niya kun holding hands ra. Unya’g matakdan siya, ayaw na paabota nga matakdan sab ka. — Tito Miguel

Magpatambag ka? Ipada kang Tito Miguel: 0991-318-9366