Uyab nga dili hinimba

Dear Tito Miguel,

Ako diay si Ar-Ar , nagpuyo sa Labangon , Cebu City . Lima ka tuig nami sa akong girlfriend nga si Kimberly . Akong problema lang ba, dili kaayo siya tigsimba . Susama mi nga katoliko ug gusto gyud ko mga magdungan mi og simba matag Dominggo. Motoo man gud ko sa panultion nga mosamot kalig-on ang usa ka relasyon basta ubanan og pag-ampo sa Ginoo.

Nabantayan nako sa akong uyab , makasimba lang kun motambong og kasal ,bunyag ug lubong nga nailhan sa kadaghanan isip KBL. Unsaon mani nako akong uyab uy, aron makumbinsir nako nga mosimba gihapon bahala'g walay okasyon. — Ar-Ar

* * *

Ar-Ar,

Dili sukod sa kaligdong ug katarong ang pagsige og  simba. Daghan og  diyosnon ug relihiyosa apan ang batasan dili makaon. Daghan sab dili mosimba apan ang batasan ug binuhatan subay sa ilang tinuohan. Hinuon, mas maayo gyud kun diyosnon na’g hinimba pa, makita pa gyud sa lihok ug mga pulong.

Kun maayo ra iyang batasan, wala siya’y tawo nga gitumban, gitikasan, gibentahaan ug gipahimuslan, igo na kaayo na nga makapasar sa lagda sa simbahan. Unsaon man nimo na’ng sige’g simba apan himantayon, tsismosa ug libakera. Duna baya mga diyosnon puerte ka mahukmanon. Posible gani usa ka nila, tungod lang ka’y dili siya hinimba nahadlok dayon ka nga basin marupok siya.

Hinimba o dili, relihiyosa o dili, sa buhat nimo makita unsa iyang pagkatawo. Busa ayaw pugsa nga mosimba, ka’y posible lahi iyang paagi pagsangyaw sa Kahitas-an. Kay kun mosimba lang siya tungod nimo, dili pa ang Ginoo iyang giadto. Busa pasagdi. Mahimo nimo agnihon dungan o kuyog mo’g simba, apan kun mobalibad, ayaw pugsa. Iya nang kaugalingon nga desisyon.Mahimo nimo siya panid-an, kun mosimang ba sa dalan. Apan bantayi sab imong kaugalingon, kay basin ang imong gikahadlokan ikaw mismo mao’y makabuhat sa kalapasan. —Tito Miguel-

Magpatambag ka? Ipada kang Tito Miguel: 0991-318-9366