Jake, naalala ang mga pinagsamahan nila ni Coco

Masayang-masaya si Jake Cuenca dahil napabilang na rin sa mga pinakabagong karakter na aabangan sa FPJ’s Batang Quiapo na pinagbibidahan ni Coco Martin. 

Isang malaking karangalan para sa aktor na makatrabaho ang mga beteranong artista sa bansa. “Extremely grateful to be part of this big successful project. Nakaka-humble kasi it’s always difficult to enter a show mid-way. Pero when you look at the cast, when you look at everyone here, you are in the presence of greatness. Dalawang mentor ko ang nandito, Tito Ronnie (Lazaro) and Tito Pen (Medina). Then my two idols are here also, Tito Albert (Martinez) and Tito Bo (Christopher de Leon),” nakangiting paha­yag ni Jake sa ABS-CBN News.

Ngayong buwan ay ipinagdiriwang ng nangu­ngunang teleserye sa bansa ang ikalawang ani­bersaryo. Ma­raming proyektong pinagsamahan nina Coco at Jake ang naalala ng aktor nang mabalitaan na magiging bahagi ng naturang serye. “I just smiled noong tumawag sa akin. Tapos sinabi sa akin, ‘Oh, papasok ka na.’ Kasi nag-flashback sa akin ang Tayong Dalawa (2009), Ikaw Lamang (2014) and Panday (2017). Definitely it feels like nag-full circle kami rito. And sabi ko nga, I’m so excited,” kwento ng binata.

Mahalaga para kay Jake na mayroon siyang mga natututunan bilang aktor sa mga proyektong ginagawa. Lubos ang pasasalamat ng binata dahil sa pagkakataong mapabilang sa serye. “As an actor, you grow through experience, through projects. I’m just excited to experience the best version of Coco Martin. I’m excited to experience the best version of all the actors here. And thank you, thank you,” pagtatapos ng aktor.

Jennylyn at Dennis, ‘di na nagkakaproblema

Mapapanood na sa mga sinehan simula Feb. 26 ang pelikulang Everything About My Wife na pinagbibidahan nina Dennis Trillo, Sam Milby at Jennylyn Mercado. Ayon kay Dennis ay mayroon nang pagkakaiba sa istilo ng kanilang pagtatrabaho ni Jennylyn ngayon. “Ngayon kasi mas nakakapag-usap na kami. Mas nakakapag-suggest ng mga atake na pwedeng gawin kumpara dati. ‘Pag kung ginawa ko ‘yon, baka sabihin noon, sobrang nagmamarunong, akala mo naman sinong magaling ‘to. Pero ngayon siyempre mag-asawa na kami,” nakangiting paliwanag ni Dennis.

Para sa aktor ay kailangang pagkasunduan muna nila ni Jennylyn ang lahat ng kanilang mga ideya upang mas mapaganda ang mga eksenang gagawin. “Mas naiintindihan na niya na siyempre pinapaganda lang naman namin. Pero siyempre chini-check kung nasa mood siya. Kasi siyempre minsan mahirap maging masyadong nagmamarunong na magaling,” dagdag pa ng prem­yadong aktor.

Ayon naman kay Jennylyn ay talagang walang naging problema sa pagitan nila ng mister pagdating sa trabaho. Sanay naman na kaming magkatrabaho simula pa no’ng kahit hindi pa kami mag-asawa. Maganda kasi ‘yung tandem naming dalawa ‘pag nasa set kami. Pinag-uusapan muna namin ‘yung bawat eksena. Paano ba namin ‘to gagawin? Tapos open kami sa isa’t isa kung meron kaming mga suggestions. Kapag may gusto ako, may gusto siyang makita or Pwede ba ‘tong i-try, gano’n? Okay, ano hindi ko naisip ‘yon ah. ’Yung mga gano’n. So maganda collaboration naming dalawa pagdating sa trabaho. Kasi maganda ‘yung kinalalabasan ng mga scenes,” kwento ni Jennylyn. — Reports from JCC