Ashley ug Mavy kumpirmadong  dunay relasyon

CEBU, Philippines — Hingpit na nga niangkon si  Ashley Ortega  sa relasyon  nila sa Kapuso star nga si Mavy Legaspi .

Gibutyag kini sa aktres sa  usa ka episode sa programang Fast Talk With Boy Abunda.

Suma pa ni Ashley nga maklaro na sa ilang mga linihokan  ang nagpahipi nila nga gugma sa usag-usa.

Saysay pa ni  Ashley nga dugay na sila nga nagkaila ni  Mavy tungod sa ilang common friends apan sa niaging tuig pa lang sila nga nag-uban og laag nga sila rang duha.

Tungod sa pagsige nila og uban,   nakaila na gyud sila  tagsa-tagsa nila ka mga batasan.

 Sa dihang wala pa maabot si  Mavy sa iyang kinabuhi,  nauyab ni Ashley kaniadto   ang mayor sa  Lucena City, Quezon  nga si Mark Alcala.

Samtang si Mavy usab  kay kanhi  uyab  ni Kyline Alcantara.

Nasigpatan usab nga nanuroy sa Cebu sila si Mavy ug Ashley niadtong Sinulog 2025. 

Karylle: "I hate fake news”

Hugtanong gihimakak sa TV host –actress nga si Karylle ang nitumaw nga taho nga matud pa nagsabak siya .

Sa latest episode sa  podcast ni Karylle nga K’s Drama , gutubag ni Karylle ang maong nikatap nga chismis.

Suma pa niya nga nagkagrabe na gyud ang fake news.

"I have been stopped on the street and congratulated for being pregnant, and I have to explain, of course, that I’m not pregnant.This is the third time that this news has circulated so I knew categorically denial would be useless because you want to believe what you want to believe, and maybe you have a good feeling about congratulating me,”  matud pa ni Karylle.

Giawhag niya ang mga tawo nga kinahanglan nga susihon gyud daan  kun makadawat og  taho  aron dili madala sa  fake news.

"I hate fake news,” ni Karylle pa. 

PBB Celebrity Edition Collab sugdan karong Marso 9

Pormal na nga gianunsyo  ang petsa alang sa pagsugod sa "Pinoy Big Brother Celebrity Edition Collab"   kun diin magsagol isip housemates ang Kapuso ug Kapamilya stars.

Ang bag-ong season sa maong reality show kay    i-ere sugod karong Marso 9, 2025.

 Sila si Gabbi Garcia ,  Robi Domingo ug  Bianca Gonzalez  ang hosts sa maong season.

Naumol ang  maong koloborasyon isip pagsaulog sa 20th anniversary sa PBB.

Mao kini ang labing unang higayon nga i-ere ang  "Pinoy Big Brother" sa  GMA Network.

Andi gibisita sa iyang mga apohan

Gibisita  si Andi Eigenmann  sa iyang mga apohan  nga sila si  Eddie Mesa ug Rosemarie Gil sa iyang gipuy-an didto sa Siargao.

Una na nga nigawas ang taho nga nagbuwag sila si Andi ug Philmar Alipayo . Sa iyang  Instagram Story, gipakita  ni Andi ang  hulagway sa  iyang mga apohan samtang naglakaw sa karsada.

Malipayong usab ang iyang mga apohan  sa dihang nahimamat nila ang ilang mga apo.

Duna pu’y nanggawas nga hulagway nga nag-uban og balik sila si Andi ug Philmar , busa  dunay mga pagduda nga nahusay na ang duha.

Nakulbaan na

Giangkon  ni Andrea Brillantes nga nakulbaan gyud siya  alang sa pagsulod niya sa   action drama series ni Coco Martin nga  "FPJ’s Batang Quiapo."  Suma pa sa aktres nga nagsige na siya og huna-huna  niini human gianunsyo ang iyang pangalan nga malakip sa maong teleserye.   Dakong garbo alang kaniya nga makauban ang veteran stars nga sama nila ni Michael de Mesa ug Shamaine Buencamino.

Wala magdahom

Aminado si Dia Mate nga wala gyud siya nagdahom nga  maangkon niya ang titulo nga  Reina Hispanoamericana 2025.   Wala pa gyud nasulod  sa iyang huna-huna ang nakab-ot  niya nga kadaogan.  Mapasalamaton siya sa Kahitas-an  ug sa mga Pinoy  nga maoy naghatag kaniya og kusog sa pagsalmot niya sa maong indigay.

Mag-concert sa laing mga nasud

Dili na gyud mabangbang ang  kasikat sa singer nga si Maki  gumikan kay nagbaha ang iyang mga konsyerto karong  tuiga. Gawas sa Pilipinas duna pud siya’y mga konsyerto laing nasud   nga sama sa  Amerika, Canada ug pipila ka mga nasud sa Asya.  Si Maki maoy nagpasikat sa awit nga “Dilaw”.